TikTok yeni funksiyalarını elan edib

    Technote.az “Engadget” platformasına istinadən bildirir ki, TikTok tətbiqi sosial təcrübəni gücləndirmək üçün iki yeni xüsusiyyət təqdim edib. Bunlardan birincisi Shared Feed adlanır və istifadəçilərə dostları və ailə üzvləri ilə eyni “lent”dən videoları izləməyə imkan verir. Onlar videoları eyni vaxtda izləməsələr də, lent hər kəs üçün uyğun olan məzmunu bir araya gətirir.

    Bu lent gündəlik olaraq TikTok fəaliyyətinə əsasən seçilən 15 videodan ibarət olur. İstifadəçilər bu lentə dəvət vasitəsilə qoşulur və istədikləri vaxt çıxa bilirlər. Yeni funksiyaya həmçinin “Shared Like” tarixçəsini və digər göstəriciləri izləməyə imkan verən xüsusi panel də daxildir. Shared Feed önümüzdəki aylarda qlobal şəkildə istifadəyə veriləcək. Bu funksiyanın Instagram-ın bu il təqdim etdiyi oxşar alətə bənzədiyi qeyd edilir.

     İkinci yenilik isə Shared Collections funksiyasıdır. Bu xüsusiyyət istifadəçilərə saxladıqları videoları qruplaşdıraraq başqaları ilə paylaşmağa imkan verir. Məsələn, oxu siyahıları, sınamağa dəyər restoranlar və ya almaq istədikləri məhsullar üçün siyahılar yaratmaq mümkündür. Sadəcə videonu yadda saxlamaq, Shared Collection yaratmaq və siyahını mesajla göndərmək kifayətdir. Bu siyahılara baxmaq üçün tərəflərin bir-birini izləməsi tələb olunur. Funksiya hazırda 16 yaşdan yuxarı bütün istifadəçilər üçün qlobal şəkildə aktivdir.