WhatsApp-da artıq nömrə paylaşmadan yazışmaq mümkün olacaq

    WhatsApp istifadəçilərin telefon nömrəsini gizli saxlamaq üçün yeni istifadəçi adı (username) sistemini istifadəyə verir. Şirkət 2026-cı ilin sonuna qədər mərhələli şəkildə təqdim ediləcək yenilik sayəsində insanların telefon nömrəsini paylaşmadan bir-biri ilə əlaqə qura biləcəyini açıqlayıb.

    Yeni sistemlə istifadəçilər telefon nömrəsi əvəzinə özlərinə məxsus istifadəçi adı yaradaraq onu paylaşa biləcəklər. Bundan əlavə, istifadəçilər müxtəlif icma və valideyn qruplarına qoşularkən telefon nömrələrini bütün iştirakçılarla bölüşmək məcburiyyətində qalmayacaqlar. WhatsApp bildirir ki, istifadəçi adları digər sosial platformalardakı adlarla eyni olmaq məcburiyyətində deyil.

    Şirkət iyunun 29-dan etibarən istifadəçi adlarının rezervasiyasına başlayıb. WhatsApp üç milyarddan çox aktiv istifadəçiyə sahib olduğu üçün şirkət məşhur adlar uğrunda rəqabətin yaranacağını gözləyir və buna görə də rezervasiya prosesini erkən başladıb. Yeni sistemdə məxfilik əsas prioritet olaraq qalır. WhatsApp ictimai istifadəçi kataloqu yaratmayacaq və insanlara digər hesabları tövsiyə etməyəcək. İstifadəçilərlə ilk dəfə əlaqə yaratmaq üçün onların dəqiq istifadəçi adını bilmək lazım olacaq.

    Şirkət həmçinin əlavə təhlükəsizlik üçün "username key" adlı yeni funksiyanı da təqdim edir. Bu xüsusiyyəti aktiv edən istifadəçilərlə əlaqə yaratmaq istəyən şəxslər həm istifadəçi adını, həm də xüsusi açarı bilməli olacaqlar. İlk dəfə istifadəçi adı vasitəsilə başlanan söhbətlərdə qarşı tərəfin telefon nömrəsi görünməyəcək. Eyni zamanda, WhatsApp uyğun istifadəçi adı tapa bilməyənlər üçün daxili istifadəçi adı generatoru da hazırlayıb.

    Şirkətlər, kontent yaradıcıları və təşkilatlar isə artıq istifadə etdikləri eyni istifadəçi adını WhatsApp-da da rezervasiya edə biləcəklər. Bu, onların bütün Meta platformalarında vahid rəqəmsal kimliyini qorumasına kömək edəcək. İstifadəçi adı rezervasiya etmək üçün WhatsApp-ın son versiyasını yeniləmək və Settings > Account > Username bölməsinə daxil olmaq kifayətdir.