WhatsApp-da hesabı olmayanlar da tədbir dəvəti ala biləcək

    “WhatsApp” “Events” funksiyasını genişləndirir. Artıq platformada hesabı olmayan şəxslər də tədbir dəvəti ala biləcəklər. Qonaqlar linki açaraq tədbir haqda məlumatlara baxacaq və tətbiqi yükləmədən iştirakını təsdiqləyəcəklər. Əvvəllər tədbirləri qrup və şəxsi söhbətlərdə yaratmaq olurdu. Yenilik yaxın bir neçə həftə ərzində mərhələli şəkildə hamıya açılacaq.

    Tədbirin sahibi dəvətnaməyə örtük şəkli əlavə edərək onu fərdiləşdirə biləcək. Dəvət linkini mətn mesajı və ya e-poçtla paylaşmaq, həmçinin QR kod təqdim etmək olar. Təşkilatçı qonaqlara ayrıca xatırlatma göndərəcək. Dəvət olunan şəxslərə özləri ilə əlavə 1 nəfər gətirməyə də icazə vermək olacaq.

    Yenilikdən sonra Ayarlar bölməsinə ayrıca “Events” səhifəsi əlavə olunacaq. İstifadəçi burada təşkil etdiyi və ya dəvət aldığı bütün keçmiş və qarşıdakı tədbirləri bir yerdə görəcək. Həmin səhifədə yeni dəvətnamə hazırlamaq, tədbirləri idarə etmək və iştirak cavablarını izləmək olar. Beləcə, tədbir planları qrup söhbətlərində itib qalmayacaq.

    Məxfiliyin qorunması üçün bəzi məhdudiyyətlər də olacaq. Tədbir sahibinin telefon nömrəsi tanımadığı qonaqlara göstərilməyəcək. “WhatsApp” hesabı olmayan qonaqlar tədbirin ünvanını yalnız iştiraklarını təsdiqlədikdən sonra görəcəklər. Adi söhbətlər və zənglər əvvəlki kimi uçdan uca şifrələnəcək, yəni onların məzmununu yalnız danışan tərəflər görə biləcək.

    Genişləndirilmiş “Events” funksiyası ilə “WhatsApp” “Partiful” kimi tədbir planlaşdırma xidmətlərinə daha yaxın rəqib olur. Şirkət ötən ay hesabı olmayan şəxslərin videozənglərə qoşulmasına da şərait yaratmışdı. Bu il çıxan istifadəçi adları sayəsində insanlar telefon nömrələrini paylaşmadan platformadan yararlana bilirlər.