WhatsApp-da reklamlar və pullu abunəliklər işə salınacaq

     Birbaşa istifadəçi xərcləri tələb etməyən bir çox xidmətlər üçün monetizasiya zərurəti gündəmdədir. Bu baxımdan WhatsApp digər rəqiblərinə nisbətən daha uzun müddət reklamdan uzaq qalsa da, Bloomberg-in məlumatına inansaq, yaxın gələcəkdə o da reklam göstərməyə və istifadəçilərə pullu xidmətlər təklif etməyə başlayacaq. Mənbənin Meta Platforms şirkətinə istinadən verdiyi məlumata görə, WhatsApp daxilində reklamlar Updates bölməsində yerləşdiriləcək. Həmin bölmə gündəlik olaraq 1.5 milyarda qədər istifadəçi tərəfindən izlənilir. Reklamverənlər həmçinin öz kanallarını daha əlverişli yerlərdə göstərmək məqsədilə WhatsApp daxilində tanıtım imkanlarından yararlana biləcəklər. Kanal sahiblərinə abunə haqqı ödəyən izləyicilərdən ibarət qapalı icmalar yaratmağa icazə veriləcək. Gələcəkdə Meta, belə pullu kanalların sahiblərindən abunə gəlirinin 10%-nə qədər komissiya haqqı götürməyi planlaşdırır.

     Lakin pullu kanalların ilkin mərhələdə istifadəyə verilməsi zamanı bu komissiya tətbiq olunmayacaq. Meta Platforms şirkəti artan ehtiyaclarını maliyyələşdirmək zərurəti ilə üzləşib. Bu səbəbdən, artıq yalnız öz sosial şəbəkələrində reklam satışından əldə olunan gəlirlə korporativ büdcəni doldurmaq niyyətində deyil. Süni zəka üçün yeni dil modellərinin hazırlanması, hesablama infrastrukturunun qurulması və Meta-nın 14.3 milyard dollar investisiya yatırdığı Scale AI startapı ilə bağlanan müqavilənin maliyyələşdirilməsi - bütün bunlar şirkətdən əlavə maliyyə resursları tələb edir. Bu baxımdan WhatsApp, müəyyən xidmətlərin monetizasiyası üçün ən uyğun namizəd kimi görünür. WhatsApp 2014-cü ildə 19 milyard dollara əldə edilib və indiyədək onun kommersiya məqsədilə istifadəsi əsasən ödəniş xidmətlərinin təşkili və ticarət platformaları ilə inteqrasiyaya yönəlib.

     Bu cür təşəbbüslər əsasən ABŞ-dan kənarda - WhatsApp-ın messencer bazarında üstünlük təşkil etdiyi Hindistan və Braziliyada həyata keçirilib. WhatsApp-a reklam inteqrasiyası indiyədək Meta-nın bu messencer istifadəçilərinə müəyyən səviyyədə məxfilik təmin etmək istəyi ilə məhdudlaşdırılırdı. Bununla belə, Meta-nın hazırkı rəhbərliyi bildirir ki, WhatsApp-a reklamın tətbiqi Facebook və ya Instagram-dakı istifadəçi məlumatlarının konkret şəkildə istifadə olunmasını nəzərdə tutmayacaq. Reklamlar istifadəçilərin şəxsi yazışmalarına qarışmayacaq. Meta nümayəndələrinin qeyd etdiklərinə görə, əgər bir şəxs WhatsApp-dan yalnız mesajlaşma və zənglər üçün istifadə edirsə, bu dəyişikliklərdən sonra ümumiyyətlə heç bir reklamla qarşılaşmayacaq. Yeni sistem bu gündən etibarən dünya üzrə tətbiq olunmağa başlayacaq, lakin bütün istifadəçiləri əhatə etməsi müəyyən vaxt aparacaq.

Mənbə: Bloomberg