WhatsApp-dakı statuslarda kontaktları qeyd etmək mümkün olacaq

     WhatsApp tərtibatçıları messencer üçün olan yeni funksiyanın testinə start veriblər. Söhbət, messencer daxilindəki statuslarda kontaktların qeyd edilməsi funksiyasından gedir. Bu yeni funksiya WhatsApp-ın Android üçün olan 2.24.20.3 nömrəli beta versiyasında test edilir. Yeni funksiya sayəsində istifadəçilər “@” işarəsindən istifadə edərək öz statuslarında kontaktlarını qeyd edə biləcəklər. Bunun üçün status paylaşımını etməyə imkan verən sahənin yanındakı “@” düyməsinə klikləmək lazım gələcək. Statusa qeyd edilmiş kontakt bu barədə bildirişi əldə edəcək və həmin statusu öz kontaktları ilə Share düyməsi vasitəsilə bölüşə biləcək. Bu funksiyanın stabil WhatsApp-da nə zaman istifadəyə veriləcəyi məlum deyil.