WhatsApp mesajlaşma və AI əsaslı funksiyaları yeniləyib

    Technote.az “The Verge” platformasına istinadən bildirir ki, WhatsApp bayram mövsümü ərəfəsində istifadəçilər üçün bir sıra yeni funksiyalar təqdim edib. Yeniliklər arasında cavabsız zənglər üçün səsli və video mesaj buraxmaq imkanı, səsli qrup söhbətlərində emoji reaksiyaları, eləcə də süni intellektlə şəkil yaratma və animasiya funksiyalarının təkmilləşdirilməsi yer alır.

    Artıq WhatsApp-da etdiyiniz zəng cavabsız qalarsa, qarşı tərəfə səsli və ya video qeyd göndərə biləcəksiniz. Şirkət video qeydlərin klassik “voicemail” anlayışını əvəz edəcəyini desə də, bu funksiyanın nə qədər geniş istifadə olunacağı hələ sual altındadır. Bundan əlavə, qrup səsli söhbətləri zamanı emoji reaksiyaları göndərmək mümkün olacaq. Bu funksiya danışığı bölmədən emosiyanı ifadə etməyə imkan verir. Qrup video zənglərində isə aktiv danışan şəxs avtomatik olaraq vurğulanacaq ki, bu da söhbəti izləməyi asanlaşdıracaq.

    WhatsApp həmçinin Meta-nın Midjourney və Flux ilə tərəfdaşlığı çərçivəsində süni intellektlə şəkil yaratma imkanlarını gücləndirib. Bu yenilik xüsusilə bayram təbrik kartları və Status paylaşımları üçün nəzərdə tutulub. İstifadəçilər artıq istənilən şəkli qısa animasiyalı videoya çevirə biləcəklər.