WhatsApp valideyn nəzarəti təqdim edir, övlad qrupa qoşulanda xəbər verəcək

    “WhatsApp” yeniyetmə hesabları üçün yeni valideyn nəzarəti alətləri çıxarır. Valideynlər övladlarının qruplardan, Kanallardan, “Status” paylaşımlarından və “Meta AI”dan necə istifadə etdiyini daha dəqiq idarə edə biləcəklər. Şirkət ilin əvvəlində azyaşlılar üçün valideyn tərəfindən idarə olunan hesablar açmışdı. Bir neçə həftə əvvəl “iOS” ayarlarına ayrıca valideyn nəzarəti bölməsi də əlavə olunmuşdu.

    Yeni ayarlarda yeniyetməni qrupa kimin əlavə edə biləcəyini və profil şəklini kimlərin görə biləcəyini seçmək olur. Valideyn övladı yeni qrupa qoşulanda və ya qrupdan çıxanda bildiriş ala bilər. Qrup 30, 100 və ya 250 üzvə çatanda da xəbərdarlıq göndərilir. Bundan başqa, yeniyetmənin hansı Kanallardan istifadə edəcəyi, kimlərin “Status” paylaşımlarını görəcəyi və öz paylaşımını kimlərə göstərəcəyi məhdudlaşdırıla bilər.

    Bütün ayarlar valideynin qoyduğu PIN kodla qorunur. Yeniyetmə hər hansı dəyişikliyə cəhd etdikdə valideynin razılığı lazım olacaq. Valideynlər nəzarəti istənilən vaxt söndürə bilərlər. Bununla belə, bu alətlər övladın yazışma və zənglərini valideynə göstərmir. “WhatsApp”a görə, şəxsi mesaj və zənglər ucdan uca şifrələnmiş qalacaq, yəni onları yalnız söhbətin iştirakçıları görə və eşidə biləcək.

    “Meta AI” üçün 2 seçim var. Bunlardan biri 13 yaş və yuxarı istifadəçilər üçün olan standart ayardır, digəri isə daha sərt “Məhdud məzmun” rejimidir. Sərt rejim yeniyetmənin çatbotla danışa biləcəyi mövzuların sayını azaldır. Şəxsi emal əsasında işləyən gizli söhbət və mesaj xülasəsi kimi funksiyalar da bağlanır. Hansı ayarın seçiləcəyinə valideyn qərar verir.

    “WhatsApp” bütün istifadəçilərdən sərt yaş yoxlaması istəmək əvəzinə nəzarəti ailələrə verir. Xidmət bəzi funksiyalarda yaş yoxlamasını genişləndirsə də, bu qayda bütün hesabları əhatə etmir. Hazırkı yaş yoxlama üsulları çox vaxt şəxsiyyət sənədi, pasport şəkli və ya üz skanı istəyir. Belə məlumatların paylaşılması məxfilik riski yaradır. Üstəlik, bu qaydaları VPN ilə keçmək də olur.

    Yeni alətlər “Meta”ya qarşı uşaqlara zərər vurulması iddiaları ilə açılan məhkəmə işləri və qanunvericilərin təzyiqi fonunda gəlir. Şirkət avqustda ABŞ-nin 29 ştatının qaldırdığı işi bağlamaq üçün 18 milyard dollar (təxminən 30,6 milyard manat) ödəməyə razılaşıb. Bu il yaş reytinqinə bənzər məzmun ayarları və azyaşlı hesabları da çıxıb. “Instagram”da özünə zərər mövzusunu axtaran uşaqlar barədə valideynlərə xəbərdarlıq göndərilir.