2019-cu ildə Tesla şirkəti özünün ilk elektrikli pikapı Tesla Cybertruck-ı təqdim etmişdi. Həmin vaxtdan sözügedən elektromobilin istehsalı dəfələrlə təxirə salınıb. Lakin Elon Musk-ın vermiş olduğu son məlumata əsasən Cybertruck-ın istehsalına 2023-cü ilin ortasında start veriləcək. Cybertruck-ın təqdimatından sonra şirkətin təqdim etmiş olduğu statistikada qeyd edilmişdi ki, təqdimatın ilk həftəsində sözügedən elektrikli pikapın ön sifariş sayı 250 000 təşkil edib.

    İndi isə qeyri-rəsmi məlumatlara əsasən Cybertruck-ın ön sifariş sayı 6 dəfə artıb və nəticədə Tesla ön sifarişlər vasitəsilə yaxşı qazanc əldə edib. Məlumatda qeyd edilib ki, son 1 il ərzində Cybertruck-ın ön sifariş sayı 1 milyondan 1.5 milyona yüksəlib. Yaxın illər ərzində Cybertruck-ın istehsal ediləcəyi yeganə zavod Tesla-nın Texas ştatında yerləşən zavodu olacaq. Qeyd etmək lazımdır ki, həmin zavodda həmçinin ikinci nəsil Roadster modeli və insana bənzər Optimus robotları istehsal ediləcək.

    Hal hazırda Cybertruck-ın ön sifarişi zamanı alıcı 100$ dəyərində girov ödəməlidir. Alıcının öz fikrindən daşınması halında ödənilmiş 100$ vəsait geri qaytarılır. Burdan belə qənaətə gəlmək olar ki, ön sifarişlər vasitəsilə Tesla 150 milyon dollar qazanc əldə edib. Bu isə şirkətin dövriyyə kapitalının yüksəlməsi üçün ciddi məbləğdir və onun bir hissəsini Cybertruck-ın istehsalı üçün lazımi hazırlıqların görülməsinə sərf etmək olar. Tesla Cybertruck-ın artıq gələn il satışa çıxacağı güman edilir.