Bee söhbəti mətnə çevirən 2 süni intellekt qeyd cihazı təqdim etdi

    “Amazon”un ötən il satın aldığı “Bee” ilk yeni məhsullarını açıqlayıb. Bunlar süni intellektlə işləyən “Bee Frontier” və “Bee Eclipse” qeyd cihazlarıdır. “Bee Frontier” artıq 74,99 dollara (təxminən 130 manat) satılır. “Bee Eclipse” isə tezliklə 99,99 dollara (təxminən 170 manat) satışa çıxacaq. İlk model biləyə və ya geyimə taxılır. Kredit kartı ölçüsündəki ikinci model smartfonun arxasına maqnitlə bərkidilir. “Bee Frontier” qiyməti 129 - 189 dollar arasında dəyişən oxşar rəqib cihazlardan daha ucuzdur.

    “Bee Frontier” əvvəlki “Pioneer” modelindən daha kiçik və yüngüldür. Köhnə model artıq satışdan çıxarılıb. Cihazda 2 mikrofon var və o, fon səslərini azalda bilir. Korpus IP67 səviyyəsində su və tozdan qorunur. USB-C portu olan modelin batareyası 7 gün işləyir. “Bee Frontier” “Onyx”, “Lavender” və “Sage” rənglərində satılır. “Silver”, “Midnight”, “Honey” və “Blush” rənglərində çıxacaq “Bee Eclipse”də 3 mikrofon var. Model bir dolumla 21 gündən çox işləyə bilir.

    Hər iki cihaz düyməyə basıldıqda gündəlik söhbətləri mətnə çevirir. Sonra həmin danışığın xülasəsini, yaddaş qeydini və görüləcək işlərin siyahısını hazırlayır. Məsələn, razılaşdırılmış görüşü təqvimə əlavə etmək, dərsdən və ya həkimlə söhbətdən qeydlər yaratmaq olur. “Gmail”, “Google Calendar” və “Microsoft Outlook” bağlantıları e-poçt qaralaması və görüş planı hazırlamağa kömək edir. Şəkilləri və “Apple”ın “HealthKit” xidmətindəki sağlamlıq məlumatlarını da ümumi nəticələrə əlavə etmək olar.

    Pulsuz paket söhbət xülasələri, ümumi icmallar və 14 günlük yaddaş verir. Aylıq 11,99 dollarlıq (təxminən 20 manat) “Bee Pro” paketində xülasələrə məhdudiyyət qoyulmur. Paketə təklif olunan tapşırıqlar, gündəlik yaddaş, şəxsi çat köməkçisi, şablonlar və başqa tətbiqlərlə bağlantılar da daxildir. Yeni müştərilər “Bee Pro”dan 30 gün pulsuz yararlana biləcək. Erkən istifadəçilərin indiyədək yararlandığı funksiyalar həmişəlik pulsuz qalacaq. Ödənişli paketə “Mac” və “Windows” üçün masaüstü tətbiq də daxildir. Bu tətbiq danışığı mətnə çevirmək üçündür.

    “Amazon.com” və “Alexa+” bağlantıları yalnız istifadəçinin icazəsi ilə “Bee Pro”da işləyir. Söhbətdə adı çəkilən məhsullar “Amazon”un ana səhifəsində alış tövsiyəsi kimi görünə və siyahıya əlavə oluna bilər. “Alexa+” ilə xülasələri, tapşırıqları və qeydləri səslə soruşmaq olur. “Echo” cihazı “Voice ID” funksiyası ilə sahibinin səsini tanıyır. İcazə verilərsə, cihaz söhbəti “Bee” üçün qeydə ala bilər.

    Məxfiliyi qorumaq üçün “Bee Private Compute” sistemi işlədilir. Cihazlar səs yazılarını saxlamır: səs real vaxtda emal olunur və sonra silinir. Mətnlər yalnız cihazın yaratdığı açarlarla şifrələnir. İstifadəçi mətnləri və xülasələri istənilən vaxt silə, səssizlik zamanı avtomatik dayanmanı qura bilər. Düymə və işıq qeydin getdiyini göstərir. Söhbətdəki digər şəxslərin kimliyi yalnız onların razılığı və səs nümunəsi olduqda müəyyən edilir.