Character.AI kitab oxumağı interaktiv oyuna çevirdi

    Technote.az “The Verge” platformasına istinadən bildirir ki, Character.AI istifadəçilər üçün yeni “Books” adlı funksiyasını istifadəyə verib. Yeni rejim klassik kitabları adi oxuma formatından çıxararaq onları interaktiv rol oyunu təcrübəsinə çevirir. Şirkətin məqsədi istifadəçilərə süni intellekt ilə daha təhlükəsiz və strukturlaşdırılmış əyləncə formatı təqdim etməkdir.

    Yeni sistem çərçivəsində istifadəçilər məşhur kitabların hadisələrinin içinə daxil ola və həmin hekayələrdə istədikləri obraz kimi iştirak edə bilərlər. Platforma başlanğıc mərhələdə Project Gutenberg kitabxanasından götürülmüş 20-dən çox klassik əsəri təqdim edir. Bunların arasında “Alice in Wonderland”, Pride and Prejudice, Dracula, Frankenstein, Romeo and Juliet və The Great Gatsby kimi məşhur əsərlər yer alır. İstifadəçilər bu kitabların içində ya mövcud personajlardan birinin roluna girə, ya da öz yaratdıqları Character.AI personajı ilə hekayəyə qoşula bilərlər.

    Books rejimində bir neçə fərqli oyun formatı təqdim olunur. “Book Arc Mode” adlı rejimdə kitabın orijinal süjeti və əsas hadisələri qorunur, sadəcə istifadəçi həmin hadisələrin içində iştirak edir. Daha sərbəst təcrübə istəyənlər üçün “Off-Script Mode” mövcuddur ki, burada istifadəçi hekayənin istiqamətini daha az məhdudiyyətlə dəyişə bilir.