Facebook və Instagram-da yaxın zamanda süni zəka reklamları sərgilənəcək

     Facebook və Instagram sosial şəbəkələrinin sahibi olan Meta Platforms şirkəti marketoloqlar üçün reklam videolarının yaradılmasını daha ucuz və rahat etmək məqsədilə bu sahədəki inkişafını davam etdirir. Bu dəfə şirkət süni zəkaya əsaslanan və şəkilləri tam formatlı videolara çevirə bilən yenilənmiş xidməti elan edib. Reklamverənlər 20-yə qədər şəkil yükləməklə, musiqi və üzərində mətn olan videolar yarada bilirlər. Meta-nın baş direktoru Mark Zuckerberg bu ili süni zəkanın əsas prioritetlərindən biri elan edib.

     Şirkət OpenAI, Google və Microsoft ilə böyük dil modellərinin hazırlanması və onların əsasında istifadəçi yönümlü funksiyaların yaradılması sahəsində rəqabəti davam etdirir. Bu ay Meta 14.3 milyard dollar həcmində Scale AI startapına investisiya yatırıb və süni zəka sahəsində yeni bir proqramçı komandası formalaşdırıb. Bununla yanaşı, Meta süni zəkanı öz reklam biznesinin əsas inkişaf istiqaməti kimi müəyyənləşdirib. Bu sahə şirkətin illik gəlirinin təxminən 98%-ni təşkil edir.

     Meta-nın reklamverənlərinin böyük hissəsi kiçik bizneslərdir və onlar üçün marketinq materiallarının istehsalı nə qədər ucuz başa gələrsə, həmin kontentin Facebook və Instagram platformalarında irəli çəkilməsinə bir o qədər çox vəsait ayıra bilirlər. Meta daha əvvəl mətn göstərişlərinə əsaslanaraq reklam şəkilləri yaradan alət, eləcə də şəkilləri GIF formatına çevirən vasitə təqdim etmişdi. Şirkət, həmçinin, istehlakçı seqmentinə yönəlmiş və mətn təsviri əsasında video yaradan Movie Gen adlı süni zəka generatoru üzərində də işləyir.