Google AI ilə hazırlanmış reklamları xüsusi etiketlə göstərəcək

    Google süni intellekt vasitəsilə hazırlanmış və ya redaktə edilmiş reklamların xüsusi etiketlə göstərilməsi funksiyasını istifadəyə verib. Yenilik sayəsində istifadəçilər reklamın hazırlanması zamanı generativ AI texnologiyalarından istifadə olunub-olunmadığını görə biləcəklər. Bu məlumat reklamın üzərindəki üç nöqtə və ya məlumat düyməsi vasitəsilə açılan "My Ad Center" bölməsində göstərilir. Funksiya Google Search, YouTube və Google Discover platformalarındakı reklamları əhatə edir və bütün dünyada istifadəyə verilir.

    Yeni bölmədə "How this ad was made" adlı seçim yer alacaq. Əgər reklam süni intellekt vasitəsilə yaradılıb və ya redaktə edilibsə, bu barədə istifadəçiyə məlumat veriləcək. Google bildirir ki, məqsəd istifadəçilərə reklamların hazırlanma prosesi barədə daha çox şəffaflıq təqdim etməkdir. Çünki generativ AI vasitəsilə hazırlanan məhsul şəkilləri bəzən real fotoşəkillərdən seçilmir və bu da istehlakçıları çaşdıra bilər.

    Əgər reklam Google-un öz AI alətlərindən istifadə edilərək hazırlanıbsa, etiket avtomatik əlavə olunur. Ancaq reklam üçüncü tərəf AI platformalarında hazırlanıbsa, həmin reklamın AI ilə yaradıldığını reklamverən özü qeyd etməlidir. Google isə bunun doğruluğunu ayrıca yoxlamayacağını açıqlayıb.