Google Gemini çatbotunda və AI axtarışında birbaşa alış-verişi sınayır

    “Google” Hindistanda “Gemini” və “AI Mode” daxilindən birbaşa alış-veriş funksiyasını sınaqdan keçirir. Sınağa qoşulan bəzi “Flipkart” məhsullarının yanında “Buy” düyməsi görünür. İstifadəçi bu düyməyə toxunduqda süni intellekt səhifəsindən çıxmadan “Flipkart”ın ödəniş mərhələsinə keçir. Beləliklə, “Google” məhsul axtarışı və tövsiyə ilə kifayətlənməyib satış prosesinə də qoşulur.

    Yenilik hələlik yalnız bəzi istifadəçilər və məhdud sayda məhsul üçün açılıb. Bunların arasında smartfonlar, elektronika və mobil aksesuarlar var. Digər istifadəçilər “Gemini” və “AI Mode”da “Flipkart” elanlarını görür, ancaq məhsulu həmin səhifədən birbaşa ala bilmirlər. “Google” funksiyanı Hindistanda bayram alış-verişi mövsümü ərəfəsində, oktyabrda daha geniş istifadəçi kütləsinə açmağı planlaşdırır.

    “Google” sınağın hansı texnologiya əsasında işlədiyini açıqlamayıb. Şirkət yalnız yeni funksiyaları mütəmadi yoxladığını deyib. “Google” ilin əvvəlində “Universal Commerce Protocol” adlı açıq standartı göstərmişdi. Bu texnologiya süni intellekt köməkçilərinin məhsul seçimindən ödənişədək mağazalarla əlaqə qurması üçündür. Ancaq hazırkı sınaqda “Google”un ödəniş səhifəsi yox, “Flipkart”ın alışın rəsmiləşdirilməsi pəncərəsi açılır.

    “Flipkart” daha əvvəl Hindistanda yeni alış-veriş funksiyaları üzərində “Google” ilə əməkdaşlıq edən platformalardan biri kimi göstərilmişdi. Şirkətlər arasında maliyyə əlaqəsi də var. “Google” 2024-cü ildə “Walmart”ın rəhbərlik etdiyi maliyyələşdirmə raundunda elektron ticarət platformasına təxminən 350 milyon dollar (595 milyon manat) sərmayə qoyub və azlıq payı alıb.

    Hindistan 1 milyarddan çox internet abunəçisi ilə dünyanın 2-ci ən böyük internet bazarıdır. “Flipkart” və “Amazon” burada, xüsusilə bayram mövsümündə onlayn alıcılar uğrunda ciddi rəqabət aparır. Sınaq zamanı nəticələrdə “Amazon” məhsulları da göstərilib, lakin onların yanında birbaşa alış düyməsi olmayıb. Funksiyanın digər mağazalara nə vaxt açılacağı hələ məlum deyil.