Google GenCast yüksək dəqiqlikli süni intellekt modeli olaraq təqdim edilib və hava proqnozlarına fokuslanır. Bu gün dəqiq hava proqnozları hazırlamaq çox böyük əhəmiyyət kəsb edir. Google bu məqsədlə yeni süni intellektini inkişaf etdirib. Google GenCast haqqında ilk məlumatlar Nature jurnalında dərc edilib. Google GenCast, tanıdığımız şəkil yaradan süni intellekt modellərinə bənzəsə də, Yerin geometriyasına uyğun şəkildə hazırlanıb. Model, Avropa Hava Proqnozları Mərkəzinin son 40 illik məlumatları əsasında təlim keçib və həmin mərkəzin ən dəqiq proqnoz aləti olan ENS-i 25 günlük dəqiqlik fərqi ilə qabaqlayıb.

     Testlərdə Google GenCast 2018-ci ilə qədər olan hava proqnozu məlumatları ilə təlim keçib və 2019-cu il üçün 1320 müxtəlif proqnoz verib. Bu proqnozlar, ENS-in məlumatları ilə müqayisə edilib. Bütün məlumatlarda Google GenCast 97.2% daha dəqiq nəticələr verib və son 36 saatlıq proqnozlarda bu dəqiqlik 99.8% yüksəlib. Fəlakətlərdən əvvəl yerli idarəetmə orqanlarına daha çox vaxt qazandırmağı hədəfləyən Google GenCast, eyni zamanda külək elektrik stansiyalarının yaxınlığındakı külək sürətini və ya günəş enerjisi stansiyalarının üzərindəki hava şəraitini proqnozlaşdıra bilir.

     Google GenCast, Google Cloud TPU v5 üzərində işləyir və fərqli ehtimallar üçün 50-dən çox proqnoz hazırlaya bilir. Onun 15 günlük bir hava proqnozunu cəmi 8 dəqiqəyə hazırladığı bildirilir. Halbuki bu müddət normalda superkompüterlərdə saatlar tələb edir. Google GenCast ictimaiyyətə açıq bir modeldir və Google artıq kodlarını paylaşmağa başlayıb. Şirkət hava proqnozu agentlikləri və alimlərlə əməkdaşlıq edərək alqoritmin daha dəqiq proqnozlar hazırlamasını təmin edəcək.