Google nəhəng günəş elektrik stansiyasının bütün istehsalını satın aldı

    Google ABŞ-də tikilən ən böyük günəş enerjisi layihələrindən biri olan Steel River Energy Center ilə uzunmüddətli müqavilə imzalayıb. Şirkət layihənin 2029-cu ildə fəaliyyətə başlayacaq ilk mərhələsində istehsal ediləcək 1,6 giqavat (GW) gücündə elektrik enerjisinin 100 %-ni satın alacaq. Layihə tam istifadəyə verildikdən sonra ümumilikdə 2,45 GW günəş enerjisi istehsal edəcək və 2 GW (son mərhələdə 2,9 GWh) batareya enerji saxlama sistemi ilə dəstəklənəcək. Bu həcmdə enerji təxminən 315 min evin elektrik tələbatını ödəməyə kifayət edir.

    Bununla belə, Google bu elektrik enerjisini birbaşa məlumat mərkəzlərində istifadə etməyəcək. Şirkət əvvəlki kimi elektrik enerjisini müxtəlif mənbələrdən ibarət ümumi elektrik şəbəkəsindən alacaq. Günəş parkından əldə olunan enerji isə həmin şəbəkəyə əlavə olunaraq Google-un ümumi karbon emissiyalarını kompensasiya etməyə kömək edəcək. Son illərdə süni intellekt texnologiyalarının sürətli inkişafı məlumat mərkəzlərinin enerji tələbatını ciddi şəkildə artırıb. Google-un elektrik enerjisi istehlakı ötən il 37 % yüksəlib və nəticədə şirkətin elektrik şəbəkəsindən qaynaqlanan karbon emissiyaları da eyni nisbətdə artıb.

    Google kimi digər texnologiya nəhəngləri də oxşar addımlar atır. Meta bu yaxınlarda Texasdakı 200 meqavatlıq günəş elektrik stansiyasının bütün istehsalını satın alıb. Amazon isə Oreqon ştatında tikilən 1,2 GW gücündə günəş və enerji saxlama layihəsini maliyyələşdirmək üçün müqavilə bağlayıb.