Google-un SynthID sistemi saxta Mitch McConnell fotosunu ifşa etdi

    Google-un süni intellekt tərəfindən yaradılmış məzmunu aşkarlamaq üçün hazırladığı SynthID sistemi ilk dəfə geniş rezonans doğuran dezinformasiya nümunələrindən birinin ifşasında mühüm rol oynayıb. Bir neçə gün əvvəl sosial şəbəkələrdə ABŞ senatoru Mitch McConnell-in xəstəxanada ağır vəziyyətdə olduğunu göstərən foto sürətlə yayılmışdı. Reddit və X platformalarında minlərlə istifadəçi tərəfindən paylaşılan görüntü senatorun səhhəti ilə bağlı yayılan iddiaları daha da gücləndirmişdi. Lakin məşhur fakt-yoxlama platforması Snopes fotonu araşdıraraq onun süni intellekt vasitəsilə yaradıldığını müəyyən edib. Araşdırma zamanı məlum olub ki, şəkil Google-un AI məzmununu tanımaq üçün hazırladığı SynthID rəqəmsal su nişanını (watermark) daşıyır. Beləliklə, sistem bu dəfə tam olaraq nəzərdə tutulduğu kimi işləyərək saxta görüntünün aşkarlanmasına kömək edib.

    Mitch McConnell iyunun 14-də təcili tibbi yardım səbəbilə xəstəxanaya yerləşdirildikdən sonra uzun müddət ictimaiyyət qarşısına çıxmadığı üçün onun sağlamlığı ilə bağlı müxtəlif şayiələr yayılırdı. Saxta foto da məhz bu vəziyyətdən istifadə edərək ictimaiyyəti çaşdırmağa hesablanmışdı. Google ilk dəfə SynthID texnologiyasını 2025-ci ildə keçirilən Google I/O konfransında təqdim edib. Sistem süni intellektlə yaradılan şəkillərə insan gözü ilə görünməyən xüsusi rəqəmsal imza əlavə edir. Bu işarə şəkil ekran görüntüsü kimi saxlanıldıqda və ya müxtəlif platformalarda paylaşıldıqda belə qorunub qalır və xüsusi alətlərlə aşkar edilə bilir.