Hollivud və Midjourney arasında AI mübahisəsi yeni mərhələyə keçdi

    Midjourney ilə Hollivudun nəhəng film studiyaları arasında davam edən hüquqi mübarizə yeni mərhələyə qədəm qoyub. Şirkət məhkəmədən Disney, Universal və Warner Bros.-un özlərinin süni intellektdən necə istifadə etdiklərinə dair sənədləri təqdim etmələrini tələb edir. Xatırladaq ki, Disney və Universal ötən il Midjourney-i müəllif hüquqlarını pozmaqda ittiham edərək məhkəməyə vermişdi. Studiyalar iddia edirlər ki, Midjourney-in modelləri Bart Simpson və Darth Vader kimi müəllif hüquqları ilə qorunan personajların şəkillərini yarada bilir. Bir neçə ay sonra isə Warner Bros. da bu iddiaya qoşulub.

    Midjourney isə öz növbəsində, süni intellekt modellərinin müəllif hüquqları ilə qorunan şəkillər üzərində öyrədilməsinin ABŞ qanunvericiliyində nəzərdə tutulan “ədalətli istifadə” prinsipi çərçivəsində mümkün olduğunu müdafiə edir. Hazırda tərəflər arasında əsas mübahisə məhkəmə prosesində təqdim ediləcək sənədlərlə bağlıdır. Hakim daha əvvəl studiyaların yalnız istifadəçilərə təqdim edilən, yəni ictimaiyyət üçün hazırlanan AI əsaslı şəkil və videolar barədə məlumat verməli olduğuna qərar vermişdi. Lakin Midjourney bu məhdudiyyətin ləğv edilməsini istəyir. Şirkət hesab edir ki, studiyalar yalnız öz iddialarını gücləndirən sənədləri seçərək təqdim edir və bununla da Midjourney-in müdafiəsinə kömək edə biləcək məlumatları gizlədir.

    Midjourney iddia edir ki, studiyalar qapalı qapılar arxasında məhz özlərinin ittiham etdiyi fəaliyyətlə məşğul ola bilər. Şirkətin fikrincə, əgər studiyalar film və serialların planlaşdırılması, ssenari ideyalarının hazırlanması və ya storyboard-ların yaradılması üçün daxili istifadə məqsədilə süni intellekt modelləri hazırlayırsa, bu, müəllif hüquqları ilə qorunan məzmunların AI təlimində istifadəsinin sənaye praktikasına çevrildiyini göstərə bilər. Bundan əlavə, Midjourney studiyalardan yalnız iddia edilən pozuntularla bağlı deyil, həm də platformada istifadə etdikləri bütün sorğuları (promptları) və əldə etdikləri nəticələri açıqlamağı tələb edir. Studiyaların baş vəkili David Singer isə bu tələbləri “balıq ovu” (fishing expedition) adlandıraraq, Midjourney-in sübut axtarmaq üçün həddindən artıq geniş məlumat toplamağa çalışdığını bildirib.