Kaliforniya ixtisar qərarını yalnız süni intellektə buraxmağı qadağan etdi

    Kaliforniya qubernatoru Gavin Newsom işçiləri süni intellektlə verilən işdən çıxarma qərarlarından və nəzarətdən qoruyan yeni qanunlar paketini imzalayıb. İşəgötürənlərin intizam tədbiri və ya işdən çıxarma qərarında yalnız süni intellektə əsaslanması qadağandır. Bu paket ABŞ-də iş yerlərində süni intellektdən istifadə ilə bağlı əməkdaşlara konkret hüquqlar verən ilk qanunlardan sayılır. Newsom deyib ki, texnologiya insanların imkanlarını artırmalı, işçilərə və onların ailələrinə zərər vurmamalıdır.

    Şirkətlər süni intellekt sisteminin səbəb olduğu kütləvi ixtisar, iş yerinin başqa yerə köçürülməsi və ya işdən çıxarma barədə əməkdaşlara aydın məlumat verməlidir. Qaydalar texnologiyanın işçini əvəz etməsini birbaşa qadağan etmir. Əsas məqsəd ixtisar qərarlarını alqoritmlərə buraxan və əməkdaşları süni intellektlə izləyən şirkətlərə nəzarətdir. İnsanlar qərar prosesindən tam kənarda qala bilməz.

    Yeni qaydalara görə, əməkdaşları sanitar qovşaqlarda süni intellekt dəstəkli alətlərlə izləmək də qadağandır. Beləliklə, iş yerində nəzarətin şəxsi məkanlara qədər yayılmasının qarşısı alınır. Hüquqşünaslar da əsas hüquqi işləri tamamilə süni intellektə ötürə bilməyəcək. Məsələn, məhkəməyə verilən əsaslandırılmış yazılı sənədlərin hazırlanmasını bütövlükdə süni intellektə tapşırmaq olmaz.

    Newsom ayrıca ştat qurumlarına texnologiyanı “super intellekt” deyil, “süni intellekt” adlandırmağa davam etməyi tapşıran sərəncam imzalayıb. Bu addım Donald Trump administrasiyasının bəzi federal əməkdaşlar üçün seçdiyi terminə cavabdır. Qubernator süni intellekt sektorunun özünü tənzimləyə biləcəyi fikrini sərt tənqid edib. Onun sözlərinə görə, federal səviyyədə daha çox addım atılmalıdır. Newsom texnologiyanın cəmiyyət üçün yarada biləcəyi təhlükələri aviasiya sektorundakı risklərlə müqayisə edib.

    Qanun paketinin hazırlanmasına “Meta” əməkdaşlarının şikayətləri də təsir etmiş ola bilər. Onların iddiasına görə, şirkətin qərəzli süni intellekt sistemi tibbi məzuniyyət götürən əməkdaşları ixtisar üçün digərlərindən daha çox seçib. İnsan resursları sahəsində keçirilən sorğu göstərib ki, hər 4 menecerdən 1-i ixtisar olunacaq işçiləri seçərkən süni intellektdən tez-tez və ya hər zaman yararlanır. Yeni qaydaların məqsədi belə qərarlarda insan nəzarətini qorumaqdır.