Meta AI şəkillərini müəyyən edən yeni alət istifadəyə verdi

    Meta özünün yeni nəsil süni intellekt modelləri ilə yaradılan şəkilləri və videoları müəyyən edə bilən yeni aşkarlama alətini təqdim edib. Hazırda sınaq mərhələsində olan veb əsaslı xidmət Muse Image modeli ilə hazırlanmış və ya redaktə edilmiş məzmunlarda görünməz rəqəmsal nişanları (watermark) aşkar edə bilir. Şirkətin açıqlamasına görə, Content Seal adlanan bu texnologiya şəkil kəsildikdə, sıxıldıqda, ölçüsü dəyişdirildikdə və ya ekran görüntüsü (screenshot) alındıqda belə özünü qoruyub saxlayır. Bu da istifadəçilərə müəyyən bir görüntünün Meta AI vasitəsilə hazırlanıb-hazırlanmadığını yoxlamağa imkan verir.

    Meta bildirir ki, hazırda alət yalnız Muse Image ilə yaradılmış və ya redaktə edilmiş şəkilləri tanıyır. Lakin gələcəkdə bu görünməz nişanların süni intellektlə hazırlanmış videolara da əlavə olunacağı açıqlanıb. Şirkət eyni zamanda Muse Video adlı yeni video yaratma modelini də yaxın zamanda təqdim etməyi planlaşdırır. Yeni sistemdə əvvəlki Meta AI versiyalarında olduğu kimi şəkillərin üzərində görünən loqo yerləşdirilmir. Bunun əvəzinə, istifadəçinin görmədiyi rəqəmsal nişanlardan istifadə edilir.

    Sınaqlar zamanı alət Meta AI ilə tam yaradılmış, eləcə də redaktə edilmiş şəkilləri uğurla müəyyən edib. Hətta həmin şəkillərin ekran görüntülərində belə Content Seal nişanı aşkar olunub. Meta bildirir ki, müsbət nəticə görüntünün Meta AI tətbiqi və ya meta.ai platforması vasitəsilə yaradıldığını və ya redaktə edildiyini göstərir. Mənfi nəticə isə həmin görüntünün Meta AI ilə işlənməsinin ehtimalının aşağı olduğunu ifadə edir. Bununla yanaşı, sistemin bəzi məhdudiyyətləri də var. Alət hazırda SynthID və C2PA Content Credentials kimi digər şirkətlərin istifadə etdiyi su nişanı standartlarını dəstəkləmir. Həmçinin Meta AI-ın əvvəlki modelləri ilə yaradılmış şəkilləri müəyyən etmək imkanına malik deyil.

    Diqqətçəkən digər məqam isə xidmətin gündəlik istifadə limiti tətbiq etməsidir. İstifadəçilər qısa müddətdə bir neçə şəkil yoxladıqdan sonra "gündəlik identifikasiya limitinə çatdınız" xəbərdarlığı ilə qarşılaşırlar. Bu yenilik Meta-nın süni intellekt məzmununun etiketlənməsi ilə bağlı son dövrlərdə aldığı tənqidlərdən sonra atdığı mühüm addımlardan biri hesab olunur. Şirkət gələcəkdə sistemin imkanlarını genişləndirərək daha çox AI məzmununu aşkarlaya biləcəyini bildirir.