Meta OpenAI və Anthropic-ə rəqib yeni AI kodlaşdırma modelini istifadəyə verdi

    Meta süni intellekt sahəsində rəqabəti daha da gücləndirəcək yeni Muse Spark 1.1 modelini ictimai istifadəyə təqdim edib. Şirkətin agent əsaslı proqramlaşdırma üçün hazırladığı multimodal model mürəkkəb proqram təminatı layihələrinin idarə edilməsi, kod yazılması və avtomatlaşdırılmış iş axınlarının icrası üçün nəzərdə tutulub.

    İlk dəfə bu ilin aprel ayında təqdim edilən Muse Spark modelinin yeni versiyası çoxmərhələli məntiq yürütmə, mürəkkəb proseslərin planlaşdırılması, rəqəmsal iş axınlarının idarə olunması və korporativ sistemlərə yeni funksiyaların inteqrasiyası kimi imkanlara malikdir. Meta bildirir ki, model proqram təminatındakı xətaları aşkarlaya və aradan qaldıra, həmçinin böyük həcmli kod miqrasiyalarını avtomatlaşdıra bilir.

    Bu seqmentdə Meta bazara OpenAI və Anthropic-dən sonra daxil olsa da, şirkət əsas üstünlüklərdən biri kimi qiymət siyasətini ön plana çıxarır. Reuters-in məlumatına görə, Muse Spark 1.1 üçün 1 milyon giriş (input) tokeninin qiyməti 1,25 dollar, 1 milyon çıxış (output) tokeninin qiyməti isə 4,25 dollar olacaq. Bu qiymətlər Anthropic-in Claude Haiku 4.5 və OpenAI-ın GPT-5.6 Luna modelləri ilə oxşar səviyyədədir. Meta-nın əsas hədəfi müəssisələrin proqramlaşdırma və avtomatlaşdırma proseslərini daha səmərəli həyata keçirməsinə kömək etməkdir. Şirkətin sözlərinə görə, Muse Spark 1.1 müxtəlif tətbiqlər və xidmətlər arasında planlaşdırma tələb edən agent əsaslı tapşırıqları yerinə yetirməkdə yüksək nəticələr göstərir.