Midjourney astrologiya tətbiqi Co-Star-ı satın aldı

    Midjourney məşhur astrologiya tətbiqi Co-Star-ı satın alıb. Məlumatı Bloomberg yayıb. Tərəflər sövdələşmənin maliyyə dəyərini açıqlamayıblar. Təxminən 4,3 milyon aylıq aktiv istifadəçisi olan Co-Star istifadəçilərin doğum tarixləri əsasında astroloji xəritələr hazırlayır, bürclərlə bağlı proqnozlar, uyğunluq analizləri və müxtəlif tövsiyələr təqdim edir. Tətbiq bu məzmunu hazırlayarkən həm süni intellektdən, həm də insan müəlliflərdən istifadə edir.

    Bu satınalma Midjourney-in fəaliyyət sahəsini genişləndirmək istədiyini göstərir. Şirkət hazırda əsasən Discord üzərindən işləyən süni intellekt platforması kimi tanınsa da, son dövrlərdə tibb və sağlamlıq sahəsində də yeni layihələr üzərində çalışdığı bildirilir. Co-Star-ın alınması isə bu strategiyanın daha geniş istehlakçı məhsullarına yönəldiyini göstərir. Satınalma çərçivəsində Co-Star-ın təxminən 24 nəfərlik komandası da Midjourney-ə qoşulub. Bu komandanın istehlakçı yönümlü mobil tətbiqlərin hazırlanması sahəsində təcrübəsi nəzərə alınaraq, Midjourney-in gələcəkdə uzun müddətdir gözlənilən müstəqil mobil tətbiqini təqdim edə biləcəyi ehtimal edilir.