OpenClaw iPhone və Android telefonlar üçün rəsmi tətbiqini təqdim edib

    Süni intellekt agentləri artıq smartfonlara daha da yaxınlaşır. Açıq mənbəli AI layihəsi olan OpenClaw həm iOS, həm də Android üçün müstəqil mobil tətbiqlərini istifadəyə verib. Bununla da istifadəçilər süni intellekt agentlərini birbaşa App Store və Play Store vasitəsilə telefonlarına quraşdıra biləcəklər.

    Yeni tətbiqlər istifadəçilərə AI köməkçisi ilə söhbət etmək və ona cihazın müxtəlif funksiyalarına giriş icazəsi vermək imkanı yaradır. OpenClaw istifadəçinin razılığı ilə kamera, ekran, məkan məlumatları, şəkillər, kontaktlar, təqvim və xatırlatmalar kimi məlumatlara çıxış əldə edə bilir. Bu isə süni intellekt agentlərinin smartfon daxilində daha geniş funksiyalar yerinə yetirməsinə şərait yaradır.

    OpenClaw son aylarda süni intellekt dünyasında sürətlə diqqət mərkəzinə çevrilib. Layihənin yaradıcısının  bu ilin əvvəlində OpenAI-a qoşulmasından sonra OpenClaw artıq fond tərəfindən idarə olunan açıq mənbəli layihəyə çevrilib. Tətbiqlər də məhz OpenClaw Fondu tərəfindən yayımlanır. Daha əvvəl OpenAI şirkəti fonda müəyyən dəstək göstərəcəyini açıqlasa da, bu dəstəyin detalları açıqlanmayıb.

    Agent əsaslı süni intellekt sistemləri xüsusilə Apple ekosistemində mübahisəli mövzulardan biri hesab olunur. Şirkət təhlükəsizlik və məxfilik səbəbləri ilə bir çox agent tipli tətbiqlərin App Store-da yayılmasına məhdudiyyətlər tətbiq etmişdi. Buna görə də iPhone istifadəçiləri indiyədək belə xidmətlərdən əsasən Telegram və WhatsApp kimi tətbiqlər üzərindən istifadə edirdilər. OpenClaw-ın rəsmi tətbiqlərinin istifadəyə verilməsi isə agent əsaslı süni intellektin mobil platformalarda daha geniş yayılmasının və yeni dövrə qədəm qoymasının göstəricisi hesab olunur.