Proton Lumo AI çatbotuna şifrəli “Projects” funksiyası əlavə etdi

    Technote.az “Engadget” platformasına istinadən bildirir ki, Proton məxfilik yönümlü süni intellekt çatbotu Lumo üçün yeni “Projects” adlı funksiyanı təqdim edib. Bu yenilik istifadəçilərə uzunmüddətli işlər üçün ayrıca və tam şifrələnmiş iş sahəsi yaratmağa imkan verir. Məsələn, bir semestr davam edəcək akademik işlər, layihə planları və ya gələcək səyahət hazırlıqları üçün bu funksiya nəzərdə tutulub.

    “Projects” funksiyası vasitəsilə Lumo hər bir layihə üçün əlavə edilən bütün məlumatları və yüklənən faylları yadda saxlayır. İstifadəçi eyni layihəyə müxtəlif cihazlardan daxil olduqda məlumatlar avtomatik sinxronlaşdırılır və tapşırıqları yenidən izah etməyə ehtiyac qalmır. Funksiya eyni zamanda Proton Drive ilə inteqrasiya olunub və sənədlərin birbaşa çat daxilində istifadəsini asanlaşdırır. Proton bildirir ki, istifadəçilər hər bir layihə üçün fərqli təlimatlar təyin edə və Lumo-nu konkret mövzuya uyğunlaşdıra bilərlər. Şirkətin vurğuladığı əsas məqam isə ondan ibarətdir ki, hər layihə ayrıca şifrələnmiş mühitdə saxlanılır və istifadəçi söhbətləri süni intellekt modellərinin təlimində istifadə olunmur.