Süni intellekt şirkəti tibbi skaner hazırlayır

    Süni intellekt əsaslı şəkil generatoru ilə tanınan Midjourney şirkəti üzərində çalışdığı futuristik tibbi skaner barədə yeni görüntülər yayımlayıb. Lakin təqdim edilən videoda cihazın həqiqətən vəd edilən imkanlara sahib olduğunu təsdiqləyən konkret sübutlar yer almayıb. Təxminən 20 dəqiqəlik "pərdəarxası" videoda şirkətin mühəndisi və eyni zamanda texnologiya bloqeri Marcin Plaza skaneri nümayiş etdirib. O, cihazı "kəsilib birləşdirilmiş çoxsaylı ultrasəs sensorlarının, lift sistemi olan böyük bir vannaya yerləşdirilmiş versiyası" kimi təsvir edib. Sistem standart kompüterlər və Raspberry Pi mini-kompüterləri ilə işləyir.

    Midjourney bu cihazı gələcəkdə spa və sağlamlıq mərkəzlərində istifadə etməyi planlaşdırır. Şirkətin məqsədi radiasiyasız, daha ucuz və ətraflı bədən görüntüləmə texnologiyası yaratmaqdır. Bununla belə, mütəxəssislər layihənin ilk təqdimatından bəri cihazın ultrasəs texnologiyasının mövcud məhdudiyyətlərini necə aşacağı ilə bağlı ciddi suallar qaldırırlar.

    Ekspertlər bildirirlər ki, şirkət indiyədək bu sistemin vəd etdiyi qədər sürətli və detallı görüntülər yarada biləcəyinə dair elmi sübut təqdim etməyib. Midjourney isə cihazın ilkin mərhələdə tibbi diaqnostika üçün deyil, bədən kompozisiyasını və sağlamlıq göstəricilərini izləyən "wellness" məhsulu kimi təqdim ediləcəyini vurğulayır. Bu yanaşma şirkətə ABŞ Qida və Dərman Administrasiyasının (FDA) uzunmüddətli təsdiq prosesindən yan keçərək məhsulu daha sürətli istifadəyə verməyə imkan yarada bilər. Şirkətin tibbi bölməsinin rəhbəri Tom Calloway bildirib ki, bədən kompozisiyasına fokuslanmaq layihəni daha sürətli bazara çıxarmağa kömək edəcək. Buna baxmayaraq, təqdimatda tez-tez tibbi terminlərdən istifadə olunub və gələcəkdə həkimlərin müntəzəm skanlardan necə faydalana biləcəyi müzakirə edilib.