Universal Music Group və ElevenLabs AI musiqi platforması hazırlayır

    “Universal Music Group” və “ElevenLabs” lisenziyalı mahnılardan istifadə edəcək yeni süni intellekt (AI) əsaslı musiqi platforması hazırlayır. Şirkətlər razılaşmanı cümə axşamı elan edib. Çoxillik lisenziya müqaviləsi əsasında yaradılan xidmət musiqi həvəskarlarına remikslər hazırlamaq imkanı verəcək. İstifadəçilər müxtəlif mahnıları birləşdirərək “mashup” yarada, həmçinin trekləri fərqli formada səsləndirə biləcəklər. Platformanın adı və təqdimat tarixi hələ açıqlanmayıb.

    Xidmətdə yalnız layihəyə könüllü qoşulan “Universal Music Group” sənətçilərinin mahnılarından istifadə olunacaq. Şirkət iştirak qərarını ifaçıların özünə buraxır. Bildirilir ki, ifaçılar və mahnı müəllifləri buna görə ədalətli ödəniş alacaqlar. “ElevenLabs” alətləri mahnıları fərqli şəkildə təqdim etməyə və fərdiləşdirilmiş vokal versiyaları yaratmağa da imkan verəcək.

    Yeni xidmət “ElevenLabs” şirkətinin “ElevenMusic” musiqi generatorundan və “Music API” həllindən ayrı fəaliyyət göstərəcək. Bu, “ElevenLabs” ilə böyük səsyazma şirkəti arasında bağlanan ilk razılaşmadır. Tərəflər qarşıdakı aylarda və illərdə sənətçilər üçün başqa süni intellekt əsaslı səs məhsulları hazırlamağı planlaşdırır. Pərəstişkarlar üçün də yeni imkanların yaradılması nəzərdə tutulur.

    “Universal Music Group” süni intellekt sahəsində “Udio” ilə də ayrıca musiqi platforması hazırlayır. Şirkət “Spotify”, “Nvidia” və “Klay” ilə AI lisenziyalaşdırma razılaşmaları bağlayıb. “Suno” isə bu həftə “v6” adlı yeni AI musiqi modellərini təqdim edib. Şirkət bu modelləri ilk dəfə “Warner Music Group”, “BMG” və digər tərəfdaşların lisenziyalı mahnıları əsasında öyrədib.

    Musiqi sənayesində süni intellektdən istifadə müəllif hüquqları ilə bağlı mübahisələrə səbəb olur. “Universal Music Group” şirkətinin də daxil olduğu böyük səsyazma şirkətləri bir neçə ay əvvəl aşağı keyfiyyətli AI mahnılarının dünya musiqi siyahılarından çıxarılmasını istəyib. 2024-cü ildə “Warner Music Group” şirkəti “Udio” ilə bağlı məhkəməyə müraciət etmişdi. Həmin iş də daxil olmaqla bəzi mübahisələr sonradan razılaşma və lisenziya müqavilələri ilə başa çatıb.