Generativ süni intellekt texnologiyaları həyatımızın demək olar ki, hər sahəsində özünü göstərməyə başlayıb. Bu gün tibbdən təhsilə qədər müxtəlif sahələrdə süni intellektin təsirini görmək mümkündür. Lakin İsveçrə süni intellektə yeni bir istiqamət qazandırıb. Süni intellekt artıq din işlərinə də müdaxilə etməyə başlayıb. İsveçrənin Lütsern şəhərində fəaliyyət göstərən St. Peter kilsəsi, “Deus in Machina (Maşındakı Tanrı)” adlı bir layihəni həyata keçirib. Bu layihə çərçivəsində İsa peyğəmbərin süni intellekt dəstəyi ilə yaradılmış bir versiyası hazırlanıb. Üstəlik, holoqram texnologiyası ilə gücləndirilən bu layihə, xristianlara peyğəmbərləri ilə üz-üzə danışırmış kimi hiss etmək imkanı verir.

     İsa peyğəmbərin süni intellekt vasitəsilə həyata gətirilmiş versiyası yalnız Lütserndə yaşayan xristianların diqqətini çəkməyib. 100-dən çox dili səlis danışa bilən bu süni intellekt, dünyanın hər yerindən ziyarətçilər qəbul etməyə başlayıb. Üstəlik, verilən açıqlamalara görə, möminlər bu vəziyyətdən olduqca razıdırlar. Bir çox insan İsa peyğəmbərlə danışmaqdan məmnun olduğunu bildirir. Bəs St. Peter kilsəsinə gələn ziyarətçilər bu süni intellektlə konkret olaraq nədən danışırlar?

 

     Xristianlıq dinində günah çıxarma adətini yəqin ki, eşitmisiniz. İnsanlar etdikləri hər hansı bir səhv üçün kilsəyə gedir, xüsusi kabinəyə daxil olur, məsul dini şəxsə vəziyyəti izah edir və Tanrıdan bağışlanma diləyirlər. İsa peyğəmbərin siluetində yaradılmış bu süni intellekt də məhz bu məqsəd üçün istifadə edilir. İnsanlar İsa peyğəmbərin qarşısında etdikləri səhvlər üçün bağışlanma istəyirlər. Bu da onların mənəvi olaraq rahatlıq tapmasına səbəb olur.