100-ə yaxın etirazçı Microsoft üçün tikilən məlumat mərkəzinə girdi

    Amsterdamda təxminən 100 etirazçı tikilməkdə olan və “Microsoft” üçün ayrılan məlumat mərkəzinin ərazisinə girib. Aksiya 6 noyabr səhər saatlarında şəhərin kənarında keçirilib. Bəzi iştirakçılar tikinti kranına qalxaraq süni intellekt (AI) əleyhinə plakat asıblar. Fələstinə dəstək xarakterli aksiyanın təşkilinə “Geef Tegengas” qrupu da qoşulub.

    Layihə hər biri 85 metr hündürlüyündə olan 3 məlumat mərkəzi qülləsindən ibarətdir. Tikintini Britaniyanın “Pure Data Centres” şirkəti aparır. Kompleksin yeganə icarəçisi “Microsoft” olacaq. Amsterdamda yeni məlumat mərkəzlərinin tikintisi 2030-cu ilə qədər qadağandır. Ancaq bu layihənin planlaşdırılmasına 2016-cı ildə başlanıldığı üçün işlər davam edir.

    Hadisə Avropada məlumat mərkəzlərinə qarşı geniş etiraz kampaniyasının keçirildiyi vaxta təsadüf edib. “Stop Dirty Data Centers” koalisiyası 6 və 7 noyabr tarixlərində 16 ölkədə aksiyalar planlaşdırıb. Kampaniya Amsterdam, Dublin, Varşava və Danimarkadakı başqa bir “Microsoft” obyektini də əhatə edir. Ümumilikdə 85 məntəqədə aksiya planlaşdırılır.

    Koalisiya Avropada böyük məlumat mərkəzlərinin tikintisinə dərhal fasilə verilməsini istəyir. Etirazçılar bu obyektlərin enerji qiymətlərini artırmasından, su çatışmazlığını və mənzil problemini dərinləşdirməsindən narahatdırlar. Onlar həmçinin iqlimə zərər, nəzarətin genişlənməsi və şəxsi məlumatların qorunması ilə bağlı riskləri vurğulayırlar. Qrup hazırda işləyən obyektlərin bağlanmasını tələb etmir. Məqsəd yeni layihələr üçün aydın qaydalar hazırlananadək tikintini dayandırmaqdır.

    “Pure Data Centres” əraziyə girən etirazçıları təhlükəsiz şəkildə oranı tərk etməyə və layihə barədə danışmağa çağırıb. “Microsoft” dinc etiraz hüququna hörmət etdiyini, amma qanunsuz hərəkətləri qəbul etmədiyini açıqlayıb. Avropa İttifaqının texnologiya məsələləri üzrə rəhbəri Henna Virkkunen süni intellekt imkanlarının vacib olduğunu deyib. Onun sözlərinə görə, məlumat mərkəzləri elektrik kəsintilərinə, yüksək enerji xərclərinə və ətraf mühitə zərərə səbəb olmamalıdır.

    Avropanın başqa ölkələrində də məlumat mərkəzlərinə məhdudiyyətlər qoyulur. Danimarkada elektrik şəbəkəsinə qoşulmaq üçün edilən müraciətlərin ümumi gücü 60 GVt həddini keçib. Bu göstərici ölkənin elektrikə ən yüksək tələbatından 8 dəfədən çoxdur. Finlandiyada “Google” şirkətinin təxminən 330 hektar meşəni icazəsiz məhv etməsi ilə bağlı iddia araşdırılır. İtaliyada kənd təsərrüfatı torpaqlarında tikilən belə obyektlərə 200% vergi qoyulub. “Microsoft” ötən ay Britaniyadakı ən böyük layihəsindən də imtina edib, çünki obyektə elektrik ən tez gələn onillikdə verilə bilər.