AI startapı Harvey 550 milyon dollar alıb, 15,5 milyard dollara dəyərlənib

    Hüquq sahəsi üçün süni intellekt (AI) həlləri hazırlayan “Harvey” çərşənbə günü 550 milyon dollar (təxminən 935 milyon manat) yeni investisiya cəlb etdiyini açıqlayıb. Bu raundda startapın dəyəri 15,5 milyard dollar (təxminən 26 milyard 350 milyon manat) olaraq qiymətləndirilib. İnvestisiya raunduna “Diffusion” və “Lightspeed Venture Partners” birgə rəhbərlik edib.

    Yeni maliyyələşmə martdakı əvvəlki raunddan cəmi bir neçə ay sonra baş tutub. Həmin vaxt “Harvey” 200 milyon dollar (təxminən 340 milyon manat) investisiya cəlb etmiş, şirkətin dəyəri isə 11 milyard dollar (təxminən 18 milyard 700 milyon manat) olmuşdu. Dekabr raundunda bu göstərici 8 milyard dollar (təxminən 13 milyard 600 milyon manat) idi. Beləliklə, startapın qiymətləndirilməsi təxminən 9 ay ərzində 2 dəfəyə yaxın artıb.

    Son raunddan sonra “Harvey”nin indiyədək cəlb etdiyi ümumi vəsait 1,55 milyard dolları (təxminən 2 milyard 635 milyon manat) keçib. Şirkət 2023-dən bəri səhmlərin qiyməti əsasında keçirilən ən azı 8 investisiya raundunu tamamlayıb. Bunlardan 5-i 2025-dən bu yana baş tutub. “Harvey” yeni raundun hansı mərhələyə aid olduğunu açıqlamayıb. Bəzi əvvəlki investisiyalar davam raundu sayıldığı üçün bu maliyyələşmə F seriyası kimi qəbul edilə bilər.

    Yeni investisiyadan bir neçə həftə əvvəl “Harvey” özünün hazırladığı ilk AI həlli olan “Harvey Tenet” modelini təqdim edib. Bu model texniki parametrləri əlçatan olan “Kimi K3” əsasında hazırlanıb və hüquqi məlumatlarla əlavə öyrədilib. Modelin hazırlanmasında startapa AI sistemlərini işlətmək üçün infrastruktur təqdim edən “Fireworks” kömək edib. “Fireworks” daha əvvəl “Cursor” şirkətinə də öz modelini hazırlamaqda dəstək göstərib.

    “Harvey” müştərilərini texniki parametrləri açıq olan AI sistemlərini seçməyə və həmin modelləri öz məlumatları ilə əlavə öyrətməyə çağırır. Bu yanaşma hüquq şirkətlərinə istifadə etdikləri modeli ehtiyaclarına uyğunlaşdırmaq imkanı verir. Nəticədə onlar yalnız “OpenAI” və “Anthropic” kimi qapalı modellər hazırlayan şirkətlərdən asılı qalmadan süni intellektdən yararlana bilirlər.