Apple Türkiyədə proqramlaşdırma və istehsal üçün 7 mərkəz açacaq

    “Apple” Türkiyədə proqram hazırlığı və istehsala yönəlmiş uzunmüddətli sərmayə proqramını elan edib. Şirkət 2027-ci ildən başlayaraq ölkədə ümumilikdə 7 yeni mərkəz açacaq. Plana 5 “Apple Developer Academy”, 1 “Apple Developer Center” və 1 “Apple Manufacturing Academy” daxildir. Açıqlama “Apple”ın keçmiş baş direktoru, hazırda isə icraçı sədri olan Tim Cook-un Türkiyə səfəri zamanı verilib.

    5 proqramlaşdırma akademiyası qarşıdakı 3 ildə Türkiyənin müxtəlif şəhərlərində açılacaq. İlk “Apple Developer Academy” İstanbulda olacaq və burada təhsil pulsuz veriləcək. 9 aylıq intensiv proqramda kodlaşdırma, dizayn, marketinq və layihələrin idarə olunması öyrədiləcək. Dərslər süni intellekt texnologiyalarını da əhatə edəcək.

    İstanbulda “Apple Developer Center” də açılacaq. Mərkəzdə proqramçılar, sahibkarlar və startaplar üçün praktiki təlimlər keçiriləcək. İştirakçılar “Apple” mütəxəssisləri ilə işləyə, şirkətin yeni alət və texnologiyalarını sınaqdan keçirə biləcəklər. Burada müxtəlif tədbirlər də keçiriləcək.

    “Apple Manufacturing Academy” 2028-ci ildə Ankarada açılacaq. Bu, şirkətin Amerika Birləşmiş Ştatlarından kənarda ilk istehsal akademiyası olacaq. Mərkəz kiçik və orta bizneslərə, tələbələrə və yenilikçi sahibkarlara pulsuz təlim və məsləhət verəcək. Dərslərdə kompüter sistemlərinin məlumatlardan öyrənməsi, nasazlıqların əvvəlcədən aşkarlanması, avtomatlaşdırma və robot texnikası izah ediləcək. Proqrama istehsalın daha səmərəli qurulması ilə bağlı praktiki məşğələlər də daxildir.