Böyük Britaniya Netflix və YouTube izləyicilərinə TV haqqı tətbiq edə bilər

    Böyük Britaniya hökuməti illik televiziya lisenziyası haqqını “Netflix”, “Disney+” və “YouTube” kimi platformalara da tətbiq etməyi düşünür. Təklif qəbul olunsa, televizorda bu xidmətlərə baxanlar “BBC” məzmununu izləməsələr belə ödəniş etməli olacaqlar. “YouTube vergisi” adlandırılan planın detalları Miladdan əvvəl açıqlanacaq xartiya yenilənməsində göstəriləcək.

    Hazırda lisenziya haqqı ildə 180 funt sterlinqdir (təxminən 410 manat). Böyük Britaniya sakinləri televizorda canlı yayıma və istədikləri vaxt açıb baxdıqları məzmuna görə bu pulu ödəyirlər. 75 yaşdan yuxarı şəxslər ödənişdən azaddır, görmə məhdudiyyətli izləyicilərə endirim edilir. Hazırkı qaydalar “Netflix”, “Disney+” və “YouTube” xidmətlərinə aid deyil.

    Hökumət internetdən məzmuna baxaraq illik ödənişdən yayınan ailələri də sistemə daxil etmək istəyir. Xüsusilə kompüter və mobil cihazlardan baxanlar lisenziya haqqı ödəməyə bilirlər. Bu da “BBC”nin maliyyə problemini artırır. 31 mart 2026-cı ildə başa çatan il ərzində TV lisenziyalarının sayı 539 000 azalıb. Son 5 ildə azalma ümumilikdə 2 milyona çatıb.

    Toplanan pulun bir hissəsi “BBC” proqramlarına və yerli jurnalistikaya ayrılacaq. Vəsaitin dezinformasiya və saxta xəbərlərlə mübarizəyə də xərclənməsi planlaşdırılır. Hökumət və “BBC” dəyişiklik qəbul olunarsa, hazırkı 180 funt sterlinqlik haqqın artıb-artmayacağını açıqlamayıb. Ətraflı məlumat yenilənmiş xartiya yayımlandıqdan sonra bilinəcək.

    Planın işləməsi üçün yayım platformaları istifadəçilərin adlarını və ünvanlarını “TV Licensing” xidmətinə verməli ola bilər. Əks halda ödənişdən yayınanları müəyyənləşdirmək çətinləşəcək. Əlavə illik xərc bəzi ailələri başqa ödənişli xidmətlərdən imtina etməyə məcbur edə bilər. Reklam və ya ümumi vergi modeli isə “BBC”nin müstəqil maliyyələşməsini qorumaq baxımından daha mürəkkəb sayılır.