Çin şirkətləri Nvidia-dan qrafik prosessor sifarişlərinin 1%-ni alacaq

    Çinin “ByteDance”, “Alibaba” və “Tencent” kimi texnologiya şirkətləri sifariş verdikləri “Nvidia RTX Pro 5500” qrafik prosessorlarının yalnız kiçik hissəsini ala biləcəklər. İstehsal tələbatı qarşılamadığı üçün yaxın bir neçə ayda sifarişlərin cəmi təxminən 1%-i çatdırılacaq. Söhbət bir neçə on min qrafik prosessordan gedir.

    İddialara görə, Çin şirkətlərinin verdiyi sifarişlərin ümumi dəyəri 70 milyard dollara (təxminən 119 milyard manat) çatır. Hər qrafik prosessorun qiyməti 11 000 dollardır (təxminən 18 700 manat). Daha əvvəl 3 milyondan çox qurğu üçün 35 milyard dollarlıq (təxminən 59,5 milyard manat) sifarişdən danışılırdı. Son rəqəmlər “Nvidia”-nın planlaşdırdığı istehsal sayından xeyli çoxdur.

    “RTX Pro 5500”-ə böyük marağın əsas səbəbi onun süni intellektlə bağlı işlərə uyğun olmasıdır. Üstəlik, bu model hazırda Çinə məhdudiyyətsiz göndərilə bilir. Qrafik prosessorda “RTX 5090” ilə eyni sayda CUDA hesablama nüvəsi və 84 GB GDDR7 yaddaş var. “RTX 5090”, “H200” və “B300” kimi digər güclü modellərdən fərqli olaraq, “RTX Pro 5500” ABŞ-nin ixrac məhdudiyyətlərinə daxil deyil.

    İlk partiyadakı bir neçə min “RTX Pro 5500”-ün 2026-cı ilin sonunadək Çindəki müştərilərə çatdırılacağı gözlənilir. İstehsal artdıqca ümumi tədarükün 2027-ci ilin sonuna qədər 700 000 ədədə çatacağı proqnozlaşdırılır. Ancaq bu plan dəyişə bilər. “Nvidia”-nın müəssisələr üçün hazırlanan süni intellekt məhsullarına üstünlük vermək üçün “RTX 5090” istehsalını dayandırdığı da iddia olunur.

    “Nvidia” neçə məhsul göndərəcəyi barədə açıqlama verməyib. Şirkətin sözçüsü deyib ki, ABŞ-nin köhnəlmiş ixrac qaydaları təxminən 5 il əvvəl çıxan oyun məhsullarını da əhatə edir və şirkətin işini məhdudlaşdırır. Onun sözlərinə görə, Çinin ABŞ-dən idxala qoyduğu məhdudiyyətlər də tədarükə mane olur.