Çinin süni intellekt çipi istehsalçısı Biren gəlirini 1 998% artırıb

    Çində süni intellekt hesablamaları üçün xüsusi çiplər hazırlayan “Biren Technology” 2026-cı ilin ilk yarısında gəlirini illik müqayisədə 1 998% artırıb. Şirkətin gəliri 8,665 milyon dollardan (təxminən 14,7 milyon manat) 183,9 milyon dollara (təxminən 312,6 milyon manat) yüksəlib. Satışlar 2025-ci ilin ikinci yarısından etibarən sürətlə artmağa başlayıb. Buna ABŞ-nin ixrac məhdudiyyətlərindən sonra “Nvidia” və “AMD” kimi Amerika şirkətlərinin Çinə süni intellekt üçün GPU tədarükünü dayandırması təsir göstərib.

    Şirkətin ümumi mənfəəti 78,552 milyon dollara (təxminən 133,5 milyon manat) çatıb. Satış gəlirindən istehsal xərcləri çıxıldıqdan sonra qalan hissəni göstərən ümumi mənfəət marjası 42,7% olub. Bununla belə, şirkət 56,2 milyon dollar (təxminən 95,5 milyon manat) zərər edib. Əsas səbəb yeni məhsulların hazırlanmasına yatırımların davam etməsidir. Vəsait süni intellekt sürətləndiricilərinə, optik əlaqə ilə işləyən server şkafı sistemlərinə və proqram təminatına yönəldilib.

    “Biren Technology”nin 2025-ci ildə gəliri 154,17 milyon dollara (təxminən 262,1 milyon manat) çatmışdı. Həmin vaxt şirkətin Çində süni intellekt sürətləndiriciləri bazarındakı payı 3%-dən az idi. Onun yüksək səviyyəli AI GPU modelləri arasında “BR106”, “BR110” və “BR166” yer alır. Hazırda “BR20X”, “BR30X” və “BR31X” sürətləndiriciləri hazırlanır. Şirkət, həmçinin “Nvidia”nın “CUDA” platforması ilə rəqabət aparmaq üçün “Birensupa” proqram paketini yaradıb. Bundan başqa, bütöv server şkafının vahid sistem kimi işləməsinə imkan verən həll üzərində çalışır.

    Məhdudiyyətlər 2025-ci ilin mayında qüvvəyə minənədək Çində yerli çiplərə tələbat aşağı idi. Çünki imkanları məhdudlaşdırılmış “Nvidia” modelləri belə daha sürətli işləyir və daha yaxşı proqram təminatı təklif edirdi. Bir “H20” AI GPU modelinin qiyməti 12 000 dollar (təxminən 20 400 manat) ilə 15 000 dollar (təxminən 25 500 manat) arasında dəyişirdi. “Nvidia” həmin ilin ilk yarısında Çinə təxminən 2,2 milyon süni intellekt sürətləndiricisi çatdırmışdı. “Biren Technology” isə il ərzində yalnız minlərlə, ehtimalən on minlərlə çip göndərib.

    1 998%-lik artım yüksək görünsə də, bu nəticə 2025-ci ilin ilk yarısında gəlirin çox aşağı olması ilə bağlıdır. 183,9 milyon dollarlıq gəlir “Biren Technology”ni hələ iri təchizatçılar sırasına çıxarmır. Şirkətin qarşısındakı əsas məsələ “SMIC” və digər istehsalçılardan kifayət qədər istehsal imkanı əldə etməkdir. Eyni zamanda, “Huawei”, “Kunlunxin” və “Cambricon” kimi daha iri yerli rəqiblərlə mübarizə aparmalıdır. ABŞ-nin məhdudiyyətləri və Çinin Amerika istehsalı süni intellekt avadanlıqlarına tətbiq etdiyi qadağalar rəqabəti azaldıb. Lakin bazar payını artırmaq üçün yeni çiplərin kütləvi istehsalına başlamaq lazımdır.