Disney Character.AI əməkdaşlarının çoxunu işə götürməyə razılaşıb

    “Character.AI” bu həftənin əvvəlində müflislik üçün müraciət edib. Bundan sonra əməkdaşlarının çoxuna “Disney”də işləmək şansı yaranıb. Əyləncə nəhəngi startapın ən azı 60 əməkdaşına iş təklifi verməyə razılaşıb. Bu rəqəm şirkətin işçi heyətinin böyük hissəsini əhatə edir. Təklif alanların çoxu artıq razılıq verib.

    Razılaşmadan əvvəl şirkətlər arasında başqa əlaqələr də qurulmuşdu. “Character.AI”ın keçmiş baş direktoru Karandeep Anand bu yaxınlarda “Disney”in ilk texnologiyalar üzrə direktoru olub. Startap daha əvvəl bəzi aktivlərini 20 milyon dollara (təxminən 34 milyon manat) “Disney”ə satacağını açıqlamışdı.

    Məhkəmə sənədlərinə görə, işə götürüləcək əməkdaşlara veriləcək maaş və digər ödənişlərin illik ümumi məbləği təxminən 60 milyon dollar (102 milyon manat) olacaq. Ancaq razılaşma hələ yekunlaşmayıb. “Disney” ilkin qiymət həddini müəyyən edib, başqa şirkət daha yüksək məbləğ təklif edə bilər.

    Sənədlərdə qeyd olunur ki, “Character.AI”ın böyük və fəal istifadəçi bazası olsa da, şirkətin xərcləri yüksəkdir. Bundan başqa, startap məhkəmə iddiaları və tənzimləyici qurumların araşdırmaları ilə üzləşib. 14 yaşlı oğlanın anası övladının intihar etməzdən əvvəl çatbotlardan birinə aludə olduğunu deyərək şirkəti məhkəməyə verib. Hökumət qurumları da uşaqların təhlükəsizliyi ilə bağlı məsələni araşdırır.