Google AI cavablarında işlənən məzmuna görə nəşrlərə ödənişi sınayır

    “Google” süni intellektlə işləyən axtarış funksiyalarında materiallarından yararlanılan nəşrlərə ödəniş etməyi sınaqdan keçirir. Bir ildən azdır davam edən proqrama kiçik və orta bloqlar da daxil olmaqla təxminən 100 rəqəmsal nəşr qoşulub. Sınaq saytların ziyarətçi sayının azalması və onların materiallarından süni intellekt cavablarında istifadə olunması ilə bağlı narazılıqlar fonunda başlayıb.

    Ödəniş hesablanarkən məzmunun “AI Overviews” xülasələrinə, axtarışdakı “AI Mode” cavablarına və “Gemini” çatbotuna nə qədər töhfə verdiyi nəzərə alınır. Proqrama ilk qoşulan nəşrlərdən biri ildə 1 milyon dollardan çox (təxminən 1,7 milyon manatdan çox) qazanıb. Bir neçə ay əvvəl qoşulan başqa bir iştirakçı indiyədək 50 000 - 60 000 dollar (təxminən 85 000 - 102 000 manat) əldə edib.

    Ödəniş məbləğləri arasında böyük fərq var. Bəzi kiçik saytlar bir neçə ayda 1000 dollardan az (1700 manatdan az) qazanıb. Bəzi nəşrlərə verilən məbləğ isə onların reklam gəlirinin 0,1 faizinə belə çatmayıb. Nəşrlər materiallarının süni intellekt xülasələrində nə qədər işlədildiyini görə bilir, amma “Google” ödənişin hansı qayda ilə hesablandığını açıqlamayıb.

    İştirakçıların müşahidəsinə görə, mediada az işıqlandırılan, amma oxucuların böyük maraq göstərdiyi mövzular daha çox gəlir gətirə bilər. Anime və oyunlar buna nümunədir. Sınağın gələcəkdə genişlənib-genişlənməyəcəyi hələ bəlli deyil. Bununla belə, süni intellektin aktual cavablar hazırlaması üçün nəşrlərin işini davam etdirməsi “Google” üçün vacib sayılır. Şirkət saytların ziyarətçi sayının azalmasına süni intellektin səbəb olduğunu qəbul etmir.

    “Google”un süni intellekt əsaslı axtarış dəyişiklikləri nəşrlərin tənqidinə və məhkəmə iddialarına səbəb olub, tənzimləyici qurumların da diqqətini çəkib. Böyük Britaniya iyunda şirkətdən nəşrlərə süni intellekt axtarışında görünməmək seçimi verməsini tələb edib. Avropa İttifaqı internet trafikinə təsirlə bağlı araşdırmaya başlayıb və axtarış sistemində dəyişiklik istəyib.