Intel oktyabrda kompüter prosessorlarının qiymətini 10% artıra bilər

    “Intel” fərdi kompüterlər üçün prosessorların qiymətini oktyabrda 10% artıra bilər. Bahalaşmanın bir neçə həftə ərzində qüvvəyə minəcəyi gözlənilir. Şirkət ilin əvvəlində də qiymətləri artırmışdı. Yeni addımın məqsədi aşağı qiymətlərlə bazar payını böyütmək deyil, kompüter prosessorları biznesindən əldə olunan gəliri artırmaqdır.

    Planlaşdırılan bahalaşma “Qualcomm” şirkətinin çiplərin qiymətini artırmasından təxminən 1 ay sonraya təsadüf edəcək. “Qualcomm” yeni qiymətləri sentyabrın 1-dən tətbiq edib. Komponent çatışmazlığı RAM, noutbuk və telefonların da bahalaşmasına səbəb olur. Bu vəziyyətin bir neçə il davam edə biləcəyi ehtimal edilir.

    “Intel” qiymət artımı ilə yanaşı, işçi sayını yenidən azaltmağı da nəzərdən keçirə bilər. Bildirilir ki, mümkün ixtisar şirkət əməkdaşlarının 5%-dən 10%-ə qədər hissəsini əhatə edə bilər. Bununla yanaşı, bəzi sahə və vəzifələr üzrə yeni əməkdaşların işə qəbulu da mümkündür.

    Şirkətin “Small Core” çip xəttinin istehsalını dayandırmaq planı da gündəmdədir. Bu plan həyata keçsə, əsas təsir sənaye kompüterlərində və IoT cihazlarında hiss olunacaq. IoT internet vasitəsilə məlumat ötürən cihaz və qurğulara verilən ümumi addır. Adi istifadəçilər üçün satılan fərdi kompüterlərin bu dəyişiklikdən ciddi təsirlənəcəyi gözlənilmir.

    “Intel” iyulda son 15 ildən çox müddətdə ən yüksək gəlir artımını açıqlamışdı. Artımın böyük hissəsi məlumat mərkəzləri və süni intellekt sahəsindən əldə olunub. Bununla belə, kompüter prosessorlarının qiymətinin artırılması şirkətin bazar payından çox mənfəətə üstünlük verdiyini göstərir. Bahalaşma baş tutarsa, yeni kompüter yığan və ya mövcud sistemini yeniləyən alıcıların xərci arta bilər.