Məhkəmə Reddit-in Anthropic şirkətinə qarşı 3 iddiasını qüvvədə saxladı

    “Reddit” süni intellekt şirkəti “Anthropic”ə qarşı açdığı məhkəmə işində mühüm qərar əldə edib. San Fransisko Ali Məhkəməsinin hakimi Harold Kahn platformanın irəli sürdüyü 5 hüquqi tələbdən 3-nün araşdırılmasına razılıq verib. 17 sentyabrda çıxarılan qərar ertəsi gün rəsmiləşib. Hakim “Anthropic”in etirazını qəbul etməyib və işin əsas hissəsinin davamına qərar verib.

    Məhkəmə müqavilənin pozulması, müqavilə münasibətlərinə müdaxilə və Kaliforniyanın ədalətsiz rəqabət qanununun pozulması ilə bağlı tələbləri qüvvədə saxlayıb. Əsassız varlanma və əmlaka qanunsuz müdaxilə barədə digər 2 tələb indiki formada rədd edilib. Hakim bu iddiaların kifayət qədər konkret olmadığını deyib. “Reddit” həmin tələbləri dəqiqləşdirərək 16 oktyabradək yenidən məhkəməyə verə bilər.

    İş “Reddit”in 2025-ci ilin iyununda şikayət verməsindən sonra başlayıb. Platforma “Anthropic”i avtomatlaşdırılmış botlarla paylaşımlara icazəsiz daxil olmaqda günahlandırır. İddiaya görə, şirkət istifadəçilərin razılığı olmadan onların şəxsi məlumatlarını “Claude” çatbotunun öyrədilməsi üçün işlədib. “Reddit” həmçinin məlumatların istifadəsi və silinməsi ilə bağlı qoruma qaydalarının pozulduğunu deyir.

    “Reddit” 2024-cü ildə “Google” və “OpenAI” ilə ayrıca lisenziya razılaşmaları bağlamışdı. Platformaya görə, bu müqavilələr istifadəçilərin öz məzmunlarını silmək hüququnu və digər qoruma tədbirlərini əhatə edir. Hakim “Anthropic”in xidmət şərtlərinin məcburi müqavilə sayılmaması barədə arqumentini də rədd edib. Qərarda şirkətin açıq xəbərdarlıqdan sonra sayta 100 000 dəfədən çox giriş etməsi həmin şərtlərdən xəbərdar olduğuna dəlil kimi göstərilib.

    “Reddit”ə görə, qərar süni intellekt şirkətlərinin lisenziya almadan məlumat toplamaqda sərbəst olmadığını göstərir. Platforma müqavilə qaydalarını və istifadəçi məxfiliyini pozan, həmçinin ədalətsiz biznes üsullarından yararlanan məlumat toplayanları məsuliyyətə cəlb etmək istəyir. “Anthropic” məhkəmə qərarı ilə bağlı hələlik açıqlama verməyib.