Microsoft OpenAI-dan asılılığını Anthropic ilə əməkdaşlıq vasitəsilə aşağı salmaq istəyir

     İndiyədək OpenAI-nin ən böyük investoru Microsoft olub, lakin gözlənilən restrukturizasiya şərtləri birincini tam şəkildə qane etmir. Hər halda, Microsoft OpenAI-nin dil modellərindən asılılığını azaltmaq niyyətindədir, OpenAI isə öz hesablama infrastrukturunu inkişaf etdirəcək və hətta LinkedIn üçün rəqib yarada bilər. Məlumata görə, Microsoft şirkəti Office 365 servisində Anthropic-in dil modellərindən istifadə etmək üçün onunla razılaşma imzalamağı planlaşdırır. Word, Excel, Outlook və PowerPoint tətbiqləri həm OpenAI, həm də Anthropic tərəfindən hazırlanmış süni intellekt funksiyaları ilə təchiz olunacaq.

     Mənbənin qeyd etdiyinə görə, Microsoft və OpenAI arasında gələcək restrukturizasiya ilə bağlı ziddiyyətlərin bu qərara aidiyyəti yoxdur. Sadəcə olaraq, bəzi süni intellekt köməkçilərinin - məsələn, mətn sorğusu əsasında təqdimat hazırlama funksiyasının - işi Anthropic platformasında daha yaxşı reallaşdırıla bilir. Xüsusilə bu sahədə OpenAI həllərindən daha üstün nəticə göstərən model Anthropic şirkətinə məxsus Claude Sonnet 4-dür. Bu, Microsoft-un OpenAI platformasından uzaqlaşmasının ilk halı deyil. GitHub Copilot daxilində şirkət Anthropic Claude və xAI şirkətinin Grok modelləri ilə inteqrasiya imkanları təklif edir.

     Bundan başqa, son vaxtlar Microsoft özünün MAI-Voice-1 və MAI-1-preview adlı dil modellərini yaratmaq üçün səylər göstərir. OpenAI üçün də Microsoft ilə əməkdaşlıq eksklüziv deyil, baxmayaraq ki, şirkət Azure hesablama infrastrukturundan istifadə etdiyinə görə bu tərəfdaşdan ciddi şəkildə asılıdır. Bir neçə gün bundan öncə məlum oldu ki, Broadcom ilə əməkdaşlıq çərçivəsində gələn ildən OpenAI-nin özünün hazırladığı çiplərin tədarükünə başlanacaq. Bu, OpenAI-yə öz hesablama infrastrukturunu daha aktiv və səmərəli şəkildə inkişaf etdirməyə imkan verəcək. Bundan əlavə, OpenAI iş axtarışı və vakansiyaların yerləşdirilməsi üçün bir platforma yaratmağı planlaşdırır ki, bu da Microsoft LinkedIn ilə rəqabət aparacaq.