Nvidia səhmləri 9,5% ucuzlaşdı: rəhbərin sevgilisi casusluqda şübhəli

    “Nvidia” səhmləri bazar ertəsi 4% ucuzlaşıb. Çərşənbə axşamı daha 5,47% geriləyən səhmlər 2 gündə təxminən 9,5% dəyər itirib. Enmə şirkətin rəhbəri Jensen Huangla bağlı ciddi iddiaların gündəmə gəlməsindən sonra baş verib. Huang Alice Huang ilə nikahdankənar münasibətini etiraf edib. ABŞ-nin kəşfiyyat qurumlarının qadını Çin üçün casusluqda şübhəli bildiyi deyilir.

    “Nvidia” direktorlar şurası məsələni araşdırmaq üçün “Wachtell, Lipton, Rosen & Katz” hüquq şirkətinə müraciət edib. Korporativ idarəetmə mütəxəssislərinə görə, bu hadisə əvvəlki oxşar işlərdən fərqlənir. Əsas sual Alice Huangın Jensen Huangdan məxfi məlumat alıb-almamasıdır. Çip dizaynları və istehsalla bağlı məlumatların ötürülməsi milli təhlükəsizlik üçün ciddi nəticələr doğura bilər.

    Araşdırma zamanı qanun pozuntusunun olub-olmadığı yoxlanacaq. Həmçinin Huangın şirkət qaydalarına əməl edib-etmədiyi və direktorlar şurasına vaxtında məlumat verib-vermədiyi araşdırılacaq. Onun 1 il əvvəl qalmaqallarla işləyən böhran kommunikasiyası şirkəti tutduğu da üzə çıxıb. Ancaq Huangın Alice Huangla bağlı casusluq şübhələrini nə vaxt öyrəndiyi bilinmir. “Nvidia” bazar günü açıqlayıb ki, şirkət sirlərinin və milli təhlükəsizliyin pozulduğunu düşünmək üçün əsas yoxdur.

    Şirkət və Jensen Huang investorları yanlış yönləndirmək iddiası ilə kollektiv məhkəmə müraciəti ilə də üzləşib. İddiaçılar münasibətin gizlədildiyini deyirlər. Onların sözlərinə görə, Alice Huangın əvvəlki işəgötürəni ilə əlaqələr adi iş münasibəti kimi göstərilib. Delaware qanunlarına əsasən, idarəetmədə səhlənkarlığı sübut etmək daha çətindir. Səhmdarlar əvvəlcə direktorlar şurasının problemi müstəqil şəkildə həll edə bilmədiyini göstərməlidirlər.

    Hadisə “Nvidia”da Jensen Huangdan sonra rəhbərliyin kimə keçəcəyi ilə bağlı sualları da yenidən gündəmə gətirib. Huangın birbaşa tabeliyində 60-dan çox rəhbər işləyir, amma şirkətin aydın varislik planının olmadığı görünür. Onun oğlu Spencer məhsul idarəetməsi üzrə direktordur. Qızı Madison məhsul marketinqi üzrə baş direktor, kürəkəni Nico Caprez isə biznesin inkişafı sahəsində çalışır.

    “Nvidia”da təsisçiyə əlavə səs üstünlüyü verən ikili səhm sistemi yoxdur. Jensen Huangın şirkətdə təxminən 3,6% səhmi var və o, səsverməyə tam nəzarət etmir. Buna görə direktorlar şurası ehtiyac yaranarsa rəhbərliklə bağlı daha sərbəst qərar verə bilər. Daxili araşdırmanın nəticəsi hadisənin Huangın vəzifəsinə və şirkətin idarəetmə modelinə nə dərəcədə təsir edəcəyini göstərəcək.