Tesla Elon Musk-ın yerinə yeni CEO axtarışı məlumatını rəsmi şəkildə təkzib edib

     Tesla Wall Street Journal (WSJ) qəzetinin şirkətin idarə heyətinin hazırkı rəhbər Elon Musk-ın yerinə yeni baş direktor axtardığı barədə yaydığı məlumatı rəsmi olaraq təkzib edib. Lakin bu açıqlama elektromobil istehsalçısının qiyməti düşmüş səhmlərinin itkilərini bərpa etməsinə kömək etməyib. Daha əvvəl WSJ məlumatlı mənbələrə istinad edərək yazmışdı ki, Tesla-nın idarə heyəti üzvləri bir neçə rəhbər axtarışı şirkətinə müraciət edərək yeni baş direktorun seçilməsi üçün rəsmi prosedurun hazırlanmasını istəyiblər. Bu xəbər şirkətin səhmlərinin 3% dəyər itirməsinə səbəb olub. Tesla-nın idarə heyətinin sədri Robyn Denholm sosial şəbəkə X-də (keçmiş Twitter) paylaşım edərək həmin məlumatın həqiqətə qətiyyən uyğun olmadığını bildirib.

     “Bu gün bir media orqanı Tesla-nın idarə heyətinin şirkətə yeni baş direktor axtarışı üçün kadr agentlikləri ilə əlaqə saxladığı barədə yalan məlumat yayıb. Bu, tamamilə yalandır (və həmin media orqanına bu barədə material dərc olunmazdan əvvəl məlumat verilib). Tesla-nın baş direktoru Elon Musk-dır və idarə heyəti onun şirkətin möhtəşəm inkişaf planını həyata keçirmək qabiliyyətinə tam şəkildə inanır” - deyə Robyn Denholm-un bəyanatında qeyd edilib. Bu məlumat Tesla-nın satış və mənfəətinin azaldığını göstərən rüblük maliyyə hesabatından sonra ortaya çıxıb.

     Musk etiraf edib ki, şirkətin səhm qiymətlərindəki azalma ABŞ prezident administrasiyasında işləməsi ilə bağlı ola bilər. O, may ayından etibarən dövlət qurumu olan DOGE-dəki işinə yalnız həftədə 1-2 gün vaxt ayıracağını vəd edib. Tesla-nın ötən rübdə ümumi gəliri illik müqayisədə 9% azalaraq 19.34 milyard dollara düşüb - analitiklər isə 21.11 milyard dollar gəlir gözləyirdilər. Avtomobil seqmentində gəlir illik müqayisədə 20% azalaraq 14 milyard dollar təşkil edib, çünki şirkət Model Y-nin yenilənmiş versiyasının istehsalına başlamaq üçün 3 zavodda istehsal xətlərini yeniləməli olub. Tesla-nın xalis mənfəəti 71% azalıb və 409 milyon dollar və ya bir səhmə görə 0.12$ təşkil edib - ötən ilin eyni dövründə bu göstəricilər müvafiq olaraq 1.39 milyard dollar və 0.41$ idi. Tesla-nın səhm qiymətləri ilin əvvəlindən bəri 30%-dən çox azalıb.

Mənbə: CNBC