Yaddaş çipi qıtlığı telefon və noutbuk istehsalını çətinləşdirir

    Davam edən yaddaş çipi qıtlığı kiçik smartfon və noutbuk istehsalçılarını cihazların quruluşunu dəyişməyə məcbur edir. Problem təkcə qiymət artımı deyil, lazımi sayda çip tapmaq da çətinləşib. Bəzi şirkətlər sifarişləri aylar əvvəl verir, digərləri cihazlarını fərqli yaddaş növlərinə uyğun hazırlayır. Alınan çiplərin saxta olub-olmadığı da ayrıca yoxlanılır.

    “Fairphone”un hesablamasına görə, təxminən 400 dollar (680 manat) qiymətində telefonlarda yaddaş xərci material dəyərinin təxminən 60%-nə çatır. Buna görə münasib qiymətli cihazların istehsalı daha da çətinləşir. Yaddaş bahalaşdıqca onun ümumi istehsal xərcindəki payı da artır. Qlobal smartfon tədarükünün 2026-cı ildə 13,9% azalaraq 1,08 milyard ədədə düşəcəyi gözlənilir.

    “SK Hynix”in baş direktoru Kwak Noh-jung iyulda deyib ki, yaddaş qıtlığının ən ağır dövrü 2027-ci ilə təsadüf edəcək. Onun fikrincə, çatışmazlıq 2030-cu ilədək davam edə bilər. Süni intellekt üçün işləyən məlumat mərkəzləri çoxlu yaddaş və məlumat saxlama çipi alır. Nəticədə kiçik cihaz istehsalçılarının çip əldə etməsi daha da çətinləşir.

    Finlandiyanın “Jolla” şirkəti bu problemin təsirini azaltmaq üçün ana platanın 2 versiyasını hazırlayıb. Şirkət bazarda hansı hissənin tapılmasından asılı olaraq birləşdirilmiş yaddaş paketini və ya ayrıca çipləri seçə bilir. “Jolla” hər partiyadan götürdüyü nümunələri də yoxlayır. Məqsəd yenilənmiş köhnə yaddaş çiplərinin yeni məhsul adı ilə satılmasının qarşısını almaqdır.

    “Framework” modullu noutbuk quruluşuna üstünlük verir. Müştərilər köhnə noutbukdan çıxardıqları yaddaşı yeni cihazda işlədə və ya ikinci əl modul ala bilirlər. Şirkət son qiyməti və alacağı məhsul sayını bilmədən, ləğv edilə bilməyən sifarişlər də verir. Belə sifarişlər istehsal başlamazdan xeyli əvvəl yerləşdirilir.

    “Framework” iyulda “Framework Laptop 13 Pro” üçün 32 GB və 64 GB yaddaş seçimlərinin qiymətini təxminən 2 dəfə artırmışdı. Qərar “LPCAMM2” yaddaş modulu istehsalçısının xərcləri yenidən hesablamasından sonra verilmişdi. Daha ucuz ehtiyat tapan şirkət sonradan həmin yaddaş seçimlərinin qiymətini yenidən endirib. Endirim artıq göndərilmiş sifarişlərə də tətbiq olunur.