2008-ci ildən Günəşin aktivliyi artmağa başlayıb

     NASA bildirib ki, 2008-ci ildən müşahidə olunan və xüsusilə də son dövrdə daha aydın görünən günəş aktivliyinin minimal mərhələsi başa çatıb. Ulduzumuz yenidən “oyanır” - Günəşin aktivliyi tədricən artır. Bu, təkcə gözəl qütb işıqları vəd etmir, həm də daha ciddi nəticələrə gətirib çıxara bilər: naviqasiya sistemlərində nasazlıqlar, elektrik şəbəkələrində problemlər, radio əlaqənin pozulması, həmçinin peyklər və kosmik ekipajlar üçün risklərin yüksəlməsi. Günəş aktivliyi bir neçə aydın dövrə malikdir: 11 illik, 100 illik, 200 illik və 1000 illik. Məntiqli səbəblərə görə ən çox öyrənilmiş dövr 11 illikdir. Müşahidələr göstərib ki, 2020-ci ildə başa çatmış 24-cü günəş dövrü 1980-ci illərdən bəri aparılan müşahidələr zamanı ulduzumuzun ən zəif aktivliyini nümayiş etdirib.

     Bu isə ilk növbədə rusiyalı alimlər tərəfindən bir sıra elmi işlərin yazılmasına imkan yaradıb və həmin işlərdə 2050-ci ilə qədər orta əsrlərdəki kimi kiçik buz dövrünün baş verə biləcəyi proqnozlaşdırılıb. İndi isə, NASA mütəxəssislərinin qeyd etdikləri kimi, mənzərə dəyişib: 2008-ci ildən başlayaraq Günəşin aktivliyi tədricən artır. Bu, təkcə ulduzun özündəki ləkələrin sayından, alışmalardan və maqnit sahələrinin güclənməsindən deyil, həm də bütün Günəş sistemində - o cümlədən Mars yaxınlığındakı aparatlarda qeydə alınan göstəricilərdən də görünür. Cari, 25-ci dövrün xeyli daha “dalğalı” olacağı gözlənilir və alimlər güclü alışmaların və tac kütləsinin atılmalarının sayının arta biləcəyi barədə xəbərdarlıq edirlər.

     Bunun simvolik xatırlatması isə bir müddət əvvəl Yer istiqamətinə “baxan” nəhəng bir tac dəliyi oldu. Xatırladaq ki, ötən ilin may ayında müşahidə tarixindəki ən güclü alışmalardan biri baş verdi. Belə hadisələr getdikcə daha tez-tez baş verə bilər. Lakin adi insanlar üçün bu, nadir bir mənzərəyə tamaşa etmək imkanıdırsa, energetiklər, rabitə operatorları və kosmik sənaye üçün bu, ciddi bir çağırışdır. Onlar radiodiapazonda yaranan maneələrdən və elektrik ötürücü xətlərində, dəmir yollarında və boru kəmərlərində induksiya olunan cərəyanlardan şəbəkələri və avadanlıqları qorumağa hazırlaşmalı olacaqlar.