The Wall Street Journal Apple şirkətinin ilk qarışıq reallıq (AR + VR / Mixed Reality) cihazı barəsində yeni məlumatlar verib. Təqdim edilmiş məlumatlarda MR cihazın bəzi özəllikləri və onun kütləvi istehsalına nə zaman start veriləcəyi qeyd edilib. Beləliklə verilmiş məlumatlara əsasən şirkətin ilk MR cihazı 4K keyfiyyətli ekranlar və xaricdən kameralar ilə təchiz olunacaq. Xarici kameralar vasitəsilə cihaz ətraf mühitin görüntüsünü əldə edəcək və onun üzərinə AR elementlər yerləşdirəcək. MR cihazın əsas istifadə ssenariləri arasında FaceTime və Apple Fitness+ tətbiqləri ilə çalışmaq və eləcə də oyunlar olacaq.

    Hələ bir neçə müddət bundan öncə ortaya çıxmış məlumatda qeyd edilmişdi ki, MR cihazın enerji təminatını xarici batareya reallaşdıracaq. The Wall Street Journal bildirib ki, Apple MR cihazın istehsalı prosesində müxtəlif problemlərlə qarşılaşır. Bununla yanaşı məlumatda qeyd edilib ki, artıq öz sözünü demiş digər cihazları ilə müqayisədə MR cihaz Apple üçün təcrübi bir layihə hesab edilir. Onun nə zaman istehsal ediləcəyi məsələsinə gəldikdə isə bildirilib ki, MR cihazın kütləvi istehsalına sentyabr ayında start veriləcək. Bəzi məlumatlara əsasən şirkətin ilk MR cihazı 3000$ satış qiymətinə sahib olacaq. Onun gələn ay baş tutacaq WWDC 2023 konfransı çərçivəsində təqdim olunacağı gözlənilir.