Biz dəfələrlə məlumat vermişik ki, Apple şirkəti Beats Studio Buds+ naqilsiz qulaqlığı üzərində çalışır. Görünür, Beats brendi altında hazırlanan yeni naqilsiz qulaqlığın satışlarına yaxın zamanda start veriləcək. Belə ki, insayderlər sözügedən naqilsiz qulaqlığın qutusunun fotolarını təqdim ediblər. Beats Sudio Buds+ ABŞ-ın Best Buy adlı mağazasında aşkar edilib. Təqdim edilmiş fotolardan da görmək olar ki, satışa çıxacaq Beats Studio Buds+ versiyalarından biri şəffaf gövdə dizaynına sahib olacaq.

    Yeni naqilsiz qulaqlıqlar xarici görünüşcə Beats Studio Buds-dan heç də fərqlənməyəcəklər. Bununla belə Beats Studio Buds+ modeli ətraf səs-küyün daha yaxşı şəkildə boğulması funksiyasını və yaxşılaşdırılmış şəffaf rejimi əldə edəcək. Yeni naqilsiz qulaqlıq MediaTek prosessoru vasitəsilə təchiz olunacaq. Qulaqlıqlar şarj keysi ilə birlikdə ümumilikdə 36 saat ərzində çalışa biləcəklər. Beats Studio Buds+ modelinin satışlarına artıq bu ayın sonunda start verilə bilər.