Sözügedən məktəbli şagird ilk olaraq, araşdırmaq üçün laboratoriyaya qaz nəcisi gətirib. Daha sonra isə Illinois Universitetindən tədqiqatçıların nəzarəti altında analizlər aparıb və bu nəcisdə antibakterial aktivlik göstərən bakteriyanı təcrid etməyi bacarıb. Nəcis üzərində aparılan analizlər göstərib ki, bu bakteriyanın istehsal etdiyi bir birləşmə xərçənglə mübarizə xüsusiyyətinə malikdir. Bu kəşf, elm tarixində ilk dəfə qeydə alınıb.

     Şagird bu tədqiqatı, dostları ilə birlikdə, gənc tələbələrin elmi karyeralarını təcrübə yolu ilə dəstəkləməyi hədəfləyən 14 həftəlik təhsil proqramının bir hissəsi olaraq həyata keçirib. Bu proqram çərçivəsində yeni antibiotiklərin axtarışı və bakteriyaların təhlili də daxil olmaqla müxtəlif mövzular tələbələrə öyrədilib.

     Qaz nəcisini araşdıran şagird proqramın sonunda "Pseudomonas idahonensis" adlı bakteriyanı təcrid etməyi bacarıb. Məlum olub ki, bu bakteriya, dəri infeksiyasına səbəb olan digər bakteriyaların böyüməsini 90%-dən çox azalda bilir. Həmçinin, əvvəllər məlum olmayan orfamid N adlı bir maddə istehsal etdiyi aşkarlanıb. Testlərdə bu maddənin melanoma və yumurtalıq xərçəngi hüceyrələrinin böyüməsini ləngitdiyi müəyyən edilib. Araşdırma nəticələrinə dair dərc edilən məqalədə qeyd olunub ki, bu antibiotik aktivliyi göstərən birləşmə ilə bağlı daha geniş məlumat əldə etmək üçün işlər davam etdirilir. Orta məktəb şagirdi isə bu işdə həmmüəllif olaraq iştirak edib. Tədqiqat ACS Omega jurnalında dərc edilib.