Böyük İT şirkətlər diqqət mərkəzində. CCleaner tətbiqində virus yaymış hackerlərin əsl məqsədləri bəlli oldu

Onlar 20-ə yaxın İT şirkətə kiberhücum reallaşdırmağı planlaşdırırmışlar. Mütəxəssislər, CCleaner tətbiqindəki virusu incələyərək öyrəniblər ki, onu, böyük İT şirkətlərin kompüterlərini yoluxdurmaq üçün planlaşdırıblar. Həmin şirkətlər arasında “Samsung”, “Google”, “Microsoft”, “Sony”, “HTC”, “D-Link”, “LinkSys” və daha 13 şirkət var.

Sözügedən virus, özünü digər viruslar kimi qələmə verirdi. Əslində isə o, yoluxmuş kompüterlərin məlumat bazasını incələyir və onların arasında həmin şirkətlərə məxsus kompüterlərin olub-olmadığını axtarırdı. Bu cür kompüterin aşkar olunması halında virus öz gizli hissəsini işə salırdı. Belə ki, o, şirkətlər barəsində gizli məlumatları əldə etməi idi. Bu barədə Engadget saytı xəbər verir.

CCleaner tətbiqinin sahibi olan “Avast” şirkəti, İT şirkətlər üçün planlaşdırılmış bu virusun əsl məqsədlərini təsdiq edib. Mütəxəssislərin qiymətləndirmələrinə görə şirkət kompüterlərinə edilmiş kiberhücumların 50%-i uğurla həyata keçirilib. Lakin kiberhücumlardan bəziləri yalnız bir kompüterə edilib. Buna görə də baş vermiş zərər o qədər də böyük deyil.

Mütəxəssislər həmçinin müəyyən ediblər ki, virusun hazırlanmasında Group 72 və Axiom adlı hacker qruplaşmalarının izləri var. Həmin hacker qruplaşmalarının isə Çin ilə əlaqəli olduqları  güman olunur. Qeyd edək ki, bir neçə gün bundan öncəki xəbərimizdə bildirilmişdi ki, məşhur CCleaner tətbiqindən istifadə etmiş 2.27 milyon insanın məlumatları oğurlanıb.