Çində donuz qaraciyərini əldə etmiş şəxs yarım ildən sonra vəfat edib

     Ksenotransplantasiya (heyvandan insana orqan köçürülməsi) 2024-cü ilin yazında həyata keçirilib və əməliyyatdan sonra donor orqanının yaxşı uyğunlaşması müşahidə olunub. Lakin təxminən 1 aydan sonra qəfil problemlər başlayıb və yarım ildən sonra xəstə mədə-bağırsaq sistemində qanaxma səbəbindən dünyasını dəyişib. Ölümcül nəticəyə baxmayaraq, alimlər heyvandan insana orqan köçürülməsi üzrə tədqiqatları davam etdirmək üçün həyati əhəmiyyətli məlumatlar əldə ediblər. Qaraciyər transplantasiyası çox mürəkkəb əməliyyat hesab olunur, buna görə də ilk ksenotransplantasiyalar əsasən ürək və böyrəklər üzərində aparılmışdı. CNN yazır ki, 2024-cü ilin may ayında Çin alimləri qaraciyər sirrozu və B hepatitindən yaranmış şişi olan 71 yaşlı kişiyə donuz qaraciyərinin köçürülməsi barədə məlumat veriblər.

     Əməliyyatdan sonrakı ilk ayda orqanın uyğunlaşma göstəriciləri əla olub, lakin 38 gün sonra qəfil ağırlaşmalar səbəbindən orqan çıxarılıb. Donuz qaraciyəri çıxarıldıqdan sonra xəstənin orqanizmində onun öz qaraciyər toxuması fəaliyyətini davam etdirib - rezeksiyadan (hissəvi çıxarılmadan) sonra kiçik qalsa da, artıq normal işləyir və orqanizmin vəziyyətini sabit saxlaya bilirdi. Həkimlər ümid edirdilər ki, orqanizm tədricən tam bərpa olunacaq, lakin transplantasiyadan 171 gün sonra kişi mədə-bağırsaq sisteminin yuxarı hissəsində baş vermiş qanaxma nəticəsində vəfat edib. Tədqiqat müəllifləri hesab edirlər ki, donuz qaraciyərinin insana köçürülməsi ağır qaraciyər zədələnmələrində aralıq (müvəqqəti) bir həll ola bilər. Onların sözlərinə görə: “Belə bir əməliyyat xəstəyə, zədələnmiş hissələrin çıxarılmasından sonra, öz qaraciyər toxumasının bərpasına qədər kifayət qədər yaşamağa və ya uyğun insan donor orqanı tapılana qədər vaxt qazanmağa kömək edə bilər”.