Çinlilər tankın idarəsi üçün artıq AR cihazdan istifadə edirlər (VİDEO)
Elm & Texnologiya
27.08.2025
Emil
Çində sentyabr ayında planlaşdırılan hərbi paraddan əvvəl ölkənin küçələrində əvvəllər rəsmi şəkildə təqdim olunmamış yeni hərbi texnika nümunəsinin göründüyü barədə məlumatlar getdikcə daha çox dərc olunur. Bu dəfə istifadəçilər artırılmış reallıq (AR) cihazı taxmış tankçıya rast gələ bildilər. Cihaz ekipajın məlumatlılığını və ümumilikdə zirehli texnikanın istifadəsinin səmərəliliyini artırmaq üçün istifadə olunur. Artırılmış reallıq cihazı xarici kameralar və sensorlara qoşulur ki, bu da ekipaj üçün döyüş meydanını 360 dərəcəlik real vaxt rejimində izləmə imkanı yaradır. Bundan əlavə, tankçılar sensorlardan və bort sistemlərindən mühüm məlumatlar əldə edə bilirlər. Daha da önəmlisi, cihazın yeni modelləri tank sürücüsünə bort idarəetmə sisteminə fiziki şəkildə toxunmadan qülləni idarə etmək imkanı verir. Artırılmış reallıq texnologiyaları müxtəlif ölkələrin silahlı qüvvələri tərəfindən, o cümlədən şəxsi heyətin təlimində fəal şəkildə istifadə olunur. Yaxın vaxtlarda isə xəbər yayıldı ki, ABŞ F-16 qırıcıları Airborne Tactical Augmented Reality System (ATARS) texnologiyası ilə təchiz ediləcək. Bu sistem döyüş şəraitini simulyasiya etməyə imkan verir və pilotların hazırlanmasında istifadə oluna bilər.
Paylaş
