AeroVironment-in kommersiya və hərbi tətbiqlər üçün hazırladığı yüksək hündürlükdə platforma stansiyası (HAPS) olan Sunglider-in yeni versiyası Horus A, 78 metrlik qanada və 1.5 kVt istifadə olunan gücə malikdir və 68 kiloqrama qədər yük daşıya bilən günəş enerjili pilotsuz uçuş aparatı stratosferdə (20 km yüksəklikdə) hərəkət edir. Yaxın zamanda sınaq uçuşunu həyata keçirən Horus A, yüksək hündürlükdə əlaqə, naviqasiya, kosmik sahə məlumatlılığı, kəşfiyyat, müşahidə və nəzarət üçün nəzərdə tutulub. Sunglider-in bu təkmilləşdirilmiş versiyasında stratosferdən sabit, yüksək sürətli və etibarlı mobil əlaqə təmin etmək məqsədilə struktur və funksional performansda yeniliklər edilmişdir.

     SoftBank-ın inkişaf partnyoru olan AeroVironment, birgə hazırladıqları Sunglider-i ABŞ Müdafiə Nazirliyi ilə yaxın zamanda keçirilmiş sahə sınağında istifadə edib. Sınaq Sunglider-in çoxlu yük daşıma qabiliyyəti və stratosferik uçuş imkanlarının Müdafiə Nazirliyinin tələblərinə uyğun olduğunu uğurla nümayiş etdirib. Horus A, uçuşun tapşırıq hissəsi zamanı eyni anda Sintetik Diafraqmalı Radarı (SAR) və Taktiki Səviyyəli Şəbəkə Radiostansiyasını işə salıb. Bundan əlavə, cihazın əlverişsiz və turbulanslı hava şəraitində effektiv manevr etmə, təhlükəsiz enmə və gələcəkdə daha uzunmüddətli tapşırıqlar üçün stratosferə geri qayıtma qabiliyyəti də sınaqdan keçirilib. ABŞ Ordusundan uçuşa yararlılıq təsdiqi və milli hava məkanında uçuş sınaqlarının davamı üçün FAA-nın Xüsusi Uçuşa Yararlılıq Sertifikatını alan Horus A, yaxın vaxtlarda əməliyyat fəaliyyətinə başlamağı hədəfləyir.