İlk dəfə insana universal qan qrupuna sahib böyrək transplantasiya edilib

     Texnologiyanın müəllifləri əmindirlər ki, onların yanaşması orqan donorluğu çatışmazlığı problemini həll etməyə və pasiyentlərin yaşama şansını artırmağa kömək edəcək, çünki artıq donor orqanının qan qrupu əhəmiyyət daşımayacaq. Hazırda vəfat etmiş donorların orqanları yalnız uyğun qan qrupu olan insanlara köçürülə bilər. Bunun səbəbi odur ki, fərqli qan qruplarında alıcının immun sistemi donor orqanına qarşı anticisimlər yaradır və onları məhv edir. Məlum olduğu kimi, antigenlərin iki növü var - A və B. Birinci qan qrupuna malik insanlar universal donor sayılır, çünki onların qanındakı eritrositlərin səthində nə A, nə də B antigenləri mövcuddur.

     Kanada və Çin alimləri donor böyrəyindən A tipli antigenləri çıxararaq orqanı transplantasiya üçün universal hala gətirməyə çalışıblar. Bunun üçün onlar antigenləri aradan qaldıra bilən xüsusi fermentlərdən istifadə ediblər. İlk uğurlu çevirmə təcrübəsi hələ 2022-ci ildə aparılmışdı - o zaman alimlər insanın ağciyər və böyrəklərindəki antigenləri dəyişdirmişdilər. İndi isə ilk dəfə olaraq belə bir böyrəyin beyin ölümü diaqnozu qoyulmuş insana transplantasiyası həyata keçirilib.

     2 gün ərzində böyrək rədd edilmə əlamətləri göstərmədən normal fəaliyyət göstərib. Üçüncü gün bəzi qan qrupu markerləri yenidən peyda olub və yüngül reaksiya yaradıb, lakin zədələnmə adi uyğunsuzluq halları ilə müqayisədə xeyli zəif olub. Bundan sonra tədqiqatçılar orqanın uyğunlaşma əlamətlərini müşahidə ediblər və təcrübəni dayandırıblar. Hazırda onlar canlı pasiyentlər üzərində pilot klinik sınaqlar keçirmək üçün tənzimləyici orqanların təsdiqini gözləyirlər. Uğurlu nəticələr donor orqan çatışmazlığı problemini böyük ölçüdə həll edə bilər - çünki hazırda pasiyentlər uyğun orqan tapmaq üçün illərlə növbə gözləməli olurlar.