1969-cu ildə, insanların Ayda ilk addımlarını atmasından yalnız bir neçə ay sonra buraxılan Skynet-1A, İngilis qüvvələri üçün rabitə məqsədilə Afrikanın şərq sahillərinin üzərinə yerləşdirilmişdi. Orijinal missiyasını bitirdikdən sonra təbii cazibə qüvvələri nəticəsində şərqə, Hind Okeanı bölgəsinə sürüşməsi gözlənilirdi. Lakin bu gün peyk 36.000 kilometr yüksəklikdə, Amerika qitəsinin üzərində, orijinal mövqeyindən çox uzaqda yerləşir.

     Yarım ton ağırlığında olan Skynet-1A başlanğıcda Afrikanın şərq sahilindən Sinqapura qədər geniş bir rabitə sahəsi təmin edərək İngiltərənin hərbi rabitəsinə töhfə verirdi. Lakin mütəxəssislərin fikrincə, təbii orbital qüvvələr peykin bugünkü mövqeyini izah etməkdə çətinlik çəkir. Buna görə də, 1970-ci illərdə peykin şüurlu bir hərəkətlə qərbə doğru hərəkət etdirildiyinə dair güclü sübutlar var. Lakin bu hərəkətin arxasında kimin olduğu hələ dəqiq bilinmir.

     Kosmos məsləhətçisi Dr. Stuart Eves, “Bu hələ də əhəmiyyətlidir, çünki Skynet-1A-nı kim hərəkətə gətirdisə, bizə yaxşılıq etməyib. Ölü olduğu üçün bir şeyə çarpma riski var və 'bizim' peykimiz olduğu üçün hələ də məsuliyyət bizim üzərimizdədir” deyir. Dr. Eves, Skynet-1A-nın son əməliyyat mərhələsinə dair heç bir qeyd tapa bilmədiyini də əlavə edir. Bundan əlavə, peykin 50 kilometrlik radiusda gündə 4 dəfə kosmik tullantılarla qarşılaşma potensialı var və bu da narahatedici bir yaxınlıq riski yaradır.

     Skynet-1A hər nə qədər İngiltərəyə məxsus olsa da, əslində İngiltərədə istehsal olunmayıb. Artıq fəaliyyət göstərməyən ABŞ-lı Philco Ford tərəfindən istehsal edilən peyk, Amerika Hərbi Hava Qüvvələrinə məxsus bir Delta raketi ilə kosmosa göndərilmişdi. Peyk, ilk başda ABŞ tərəfindən idarə olunub, lakin zəruri proqram təminatlarının sınaqlarının təsdiqindən sonra idarəetmə Kral Hərbi Hava Qüvvələrinə (RAF) təhvil verilib.

     Təqaüdçü mühəndis Graham Davison, 1970-ci illərdə peyki İngiltərənin Hampshire bölgəsindəki RAF Oakhanger bazasından idarə etdiyini bildirir. O, illər keçdikcə Skynet-1A-nın yenidən ABŞ-a təhvil verilmiş ola biləcəyini, lakin belə edilibsə də, bunun səbəbini xatırlamadığını deyir. Rəsmi qeydlər də Davison-un bu fikrini təsdiqləyir. Skynet-1A-nın statusu ilə bağlı natamam olsa da, rəsmi qeydlər RAF-ın 1977-ci ilin iyununda peyki amerikalılara təhvil verdiyini göstərir. Bunun bir baxım prosesi çərçivəsində edildiyi qeyd olunur. Lakin peyk haqqında çox az rəsmi sənəd və qeyd olması, bu barədə məlumatların fərziyyələrə əsaslanmasını maraqlı edir. Normalda fəaliyyətini bitirmiş peyklər “orbit məzarlığına” yerləşdirilir. Bu, köhnə kosmik tullantıların aktiv telekommunikasiya peyklərinə zərər vurma riskinin sıfır olduğu səma bölgəsinin daha yüksək bir hissəsini ifadə edir. Bu tətbiq indi standart olsa da, 1970-ci illərdə kosmosda davamlılıq mövzusu çox düşünülmürdü.